İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 125 Hüküm no: 86 Orijinal metin no: [20a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gördöslü Hasan Çavuş’un muhallefatından dolayı vereselerinin anlaştığı Bundan esbak müteveffâ olan Gördöslü Hasan Çavuş b. Abdullah’dan zevcesi vârisesi olan Neyyâre Hatun bt. Abdullah meclis-i şer‘-i şerîfde müteveffâ-yı mezbûrun sagīre kızları Rabia ve Safiye’nin vasîyy-i mansûbu ve kebîre kızı Fatıma’nın husûs-ı âtîye ale’n-nehci’ş-şer‘î vekâleti sâbite olup vekîli olan fahrü’l-akrân Kasım Bey b. Abdullah mahzarında takrîr-i merâm edip zevcim müteveffâ-yı merkūmun mahrûse-i İstanbul’da ve kazâ-i Gördös’da vâki‘ olan akār ve emti‘a ve urûz ve nukūdu vekîl-i mersûm Kasım Bey kavli ve kassâm-ı askerî defteri mûcebi üzere cem‘an yirmi bir yük ve yedi yüz yetmiş akçe olup meblağ-ı merkūmdan harc-ı ma‘kūl için beş bin akçe ihrâc olundukdan sonra bâkī kalan yirmi yük ve doksan beş bin yedi yüz yetmiş akçeden benim hisse-i şer‘iyem iki yüz altmış bir bin dokuz yüz yetmiş akçe olup müteveffâ-yı merkūmun muhallefâtından olup mahrûse-i mezkûrede Sultan Bâyezid havlusunda mühreciler ardında olan mahallede vâki‘ olup lede’l-cîrân ve ma‘lûmü’l-hudûd olan mülk menzili yüz seksen bin akçeye ben kabûl ve kabz ve tesellüm edip ve müteveffâ-yı merkūmun medyûnu Murad Ağa’dan havâle-i şer‘iye ile havâle olunan altı bin akçeyi kabûl edip sümün hissemden ancak kırk beş bin dokuz yüz yetmiş bir akçe bâkī kalmışdı onu hâlâ vasîyy-i mezbûr Kasım Bey yedinden bi’t-tamam ve’l-kemâl alıp kabz ve tesellüm eyledim ve dört bin akçe mehr-i müeccelim için muhallefât-ı müteveffâdan olup zimmet-i mezkûrdan hâric beynimizde ilm-i şer‘î ile ma‘lûm dört bin akçelik eşyâyı kabz ve tesellüm eyledim müteveffâ-yı merkūmun Perviz Çavuş’da olan meblağından gayrı muhallefâtından bi-vechin mine’l-vücûh medhal [ve] alâkam ve da‘vâ ve nizâ‘ım kalmadı deyü ikrâr-ı tav‘î etdikde mâ-hüve’l-vâki‘ kayd-şüd. [Tarih yazılmamıştır.] Şühûdü’l-hâl: Musa Efendi b. Derviş el-müderris ve Ali Çelebi el-kādı ve Mustafa b. Ali el-muhzır ve Mahmud Çavuş b. Mehmed ve gayruhum.