İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 136 Hüküm no: 104 Orijinal metin no: [22b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Niğbolu sancakbeyi Mustafa Bey’in çocuklarının vasisi olan Mustafa Efendi’nin alacak davasından men olunduğu Mahrûse-i İstanbul’da Davud Paşa merhûm Câmi‘i kurbünde olan mahallede sâkin olup Rumeli’nde Niğbolu sancağı beyi iken vefât eden merhûm Mustafa Bey b. Kubad’ın sagīr oğlu Ali ve sagīre kızları Fatıma ve Ümmühani ve Rabia ve Âişe’nin tesviye-i umûru için kıbel-i şer‘-i şerîfden mansûb vasîyy-i şer‘îleri olan umdetü erbâbi’t-tahrîr ve’l-kalem Mustafa Efendi b. Süleyman dâme mecdühû meclis-i şer‘-i şerîfde atabe-i aliyye müteferrikalarından umdetü’l-a‘yân Mehmed Ağa b. Abdurrahman’ın husûs-ı âtîye vekîl olup ale’n-nehci’ş-şer‘î Hasan b. Yusuf ve Ali b. Abdi ve Ahmed Bey b. Cafer şehâdetleri ile vekâleti sâbite olan Mehmed Bey b. Ahmed Efendi mahzarında takrîr-i merâm edip müvekkil-i mezbûr Mehmed Ağa b. Abdurrahman müteveffâ-yı merkūmun hâl-i sıhhatinde vekîli olmağla müteveffâ-yı merkūmun merhûm Sinan Paşa’da olan üç yüz yetmiş beş bin akçesinden müvekkil-i mezbûr Mehmed Ağa yüz altmış beş bin akçe kabz etmişdir. Kabz etdiği meblağ-ı merkūmu vesâyetim hasebiyle taleb ederin suâl olunsun dedikde gıbbe’s-suâl vekîl-i mezbûr cevâb verip müteveffâ-yı merkūm Mustafa Bey b. Kubad müvekkilem mûmâ-ileyh Mehmed Ağa’yı hâl-i hayatında fi’l-hakīka Sinan Paşa’da olan üç yüz yetmiş beş bin akçesini kabza ve kabz etdiği meblağdan düstûr-i ekrem müşîr-i efham Hasan Paşa hazretlerinin Vakfı’na olan yüz bin akçe deynini ve at ve eyer ve üzengi bahâsından işbu meclis-i şer‘de hâzır olan Duhânîzâde dâmâdı Mustafa Çavuş b. Mehmed’e olan yirmi bin akçe deynini ve ücret-i sınâ‘atdan işbu meclis-i şer‘de hâzır olan zimmî Dolet’e olan beş bin akçe deyni ve bâkī kalanı vakıf mütevellîsi olan Mustafa Çelebi b. Yunus’a edâ ve teslîm-i tevkîl edip müvekkilem mezbûr dahi vekâlet-i meşrûhayı kabûl etdikden sonra vekâleti hasebiyle mezbûr Sinan Paşa’dan kabz etdiği ancak yüz altmış beş bin akçeden yüz bin akçeyi müşârün-ileyh Hasan Paşa hazretlerinin Vakfı’na olan yüz bin akçe deynini edâ ve meblağ-ı mezbûru vâkıf-ı mûmâ-ileyh Hasan Paşa hazretlerine teslîm eyledi ve yirmi bin akçesin mezbûr Mustafa Çavuş’a ve beş bin akçesin zimmî merkūma ve on bin akçesin mütevellî-i merkūm Mustafa Çelebi’ye teslîm eyledi deyicek müşârün-ileyh Mustafa Efendi inkârıyla mukābele etmeğin sıdk-ı makāline vekîl-i mezbûrdan beyyine taleb olundukda ahrâr-ı Müslimînden Mehmed b. Osman el-kâtib ve Ahmed Bey b. Cafer es-Silâhî meclis-i şer‘-i şerîfe li-ecli’ş-şehâde hâzırân olup müteveffâ-yı merkūm Mustafa Bey b. Kubad müvekkil-i mûmâ-ileyh Mehmed Ağa’yı hâl-i hayatında bizim huzûrumuzda fi’l-hakīka Sinan Paşa’da olan üç yüz yetmiş beş bin akçesini kabza ve kabz etdiği meblağdan düstûr-i ekrem müşîr-i efham müşârün-ileyh Hasan Paşa hazretlerinin Vakfı’na olan yüz bin akçe deynini edâya ve mezbûr Mustafa Çavuş’a olan yirmi bin akçe deynini edâya ve ücretden zimmî-i mezbûra olan beş bin akçe deyni edâya ve bâkī kalanı mütevellî-i mezbûr Mustafa Çelebi’ye teslîm-i tevkîl etdikden sonra müvekkil-i mezbûr dahi vekâlet-i meşrûhayı kabûl etdi biz bu husûsa şâhidleriz şehâdet-i şer‘iye dahi ederiz deyü edâ-i şehâdet-i şer‘iye etdiklerinde gıbbe’t-tezkiye ve’t-ta‘dîl şehâdetleri makbûle olup mu‘ârazadan men‘ olundukda mâ-vaka‘a bi’t-taleb ketb olundu. Tahrîren fî-sâbi‘ [min] Şevvâl li-sene hamse ve elf. Şühûdü’l-hâl: İsmail Efendi eş-şehîr bi-Nakībzâde? Ahmed [b.] Ali, Yusuf Çelebi b. Abdüllatif, Mehmed b. Mustafa, Mustafa b. Mahmud ve gayruhum.