İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 137 Hüküm no: 105 Orijinal metin no: [22b-2, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteferrika Mahmud Ağa’nın ölen Mehmed Çavuş’un mirasçısı olduğu Mahmiye-i Kostantıniyye mahallâtından Elvan Bey mahallesi sükkânından Mustafa Çelebi b. Abdurrauf, Şaban Çelebi b. Abdullah, Şaban Çelebi b. Abdurrahman nâm kimseler ve Mehmed b. Ramazan nâm kimse meclis-i şer‘-i şerîfe hâzırûn olup bundan akdem mahalle-i mezbûrede vefât eden merhûm Mehmed Çavuş b. Abdullah’ın zevcesi ve vârisi ve yine İsmihan nâm sagīre kızının vasîsi olan Fatıma Hatun bt. Abdullah nâm hatunun mahzarında atebe-i aliyye müteferrikalarından fahrü’l-akrân Mahmud Ağa b. Abdullah’dan sâdır olan da‘vâ-yı sahîha-i şer‘iyede gıbbe’l-istişhâd şöyle şehâdet ettiler ki, müdde‘î-yi mezbûr Mahmud Ağa, usûbet-i nesebiyye cihetinden müteveffâ-yı merkūmun vârisidir. Şu cihetle ki müdde‘î-yi mezkûr, Simon nâm Yahûdînin sulbî oğludur. O dahi Yahûdî Pesaha’nın sulbî oğludur. O dahi mezbûr Simon’un sulbî oğludur. Babaları Samson el-Yahûdîdir. İkisi ana-baba bir kardeştir. Anaları Sima el-Yahûdîyyedir. Maskat-ı re’sleri mahalle-i mezkûredir. Onlardan gayrı vâris-i ma‘rûfu ma‘lûmumuz değildir. Şehâdeten sahîhaten şer‘iyeten makrûneten bi’l-kabûl ba‘de ca‘li şerâitihî mer‘iyeten, hâkim şehâdetleri mûcebince hükmetti. Cerâ zâlike ve hurrire fi’l-yevmi’s-sâbi‘ min-Şevvâl li-sene hamse ve elf. Şühûdü’l-hâl: el-Hâc Mahmud b. Mehmed el-müezzin, Süleyman b. Ahmed, Mehmed b. Hamza, Sinan b. Abdullah, Hasan b. Mehmed el-imâm, Ömer Bey b. Ali el-cündî, Mehmed Bey b. Abdullah el-bevvâb, Mehmed b. Hasan ve gayruhum