İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 141 Hüküm no: 109 Orijinal metin no: [24a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müşerref Hatun’un vefat eden kocası Hüseyin Çavuş ve kızı Fatıma’nın muhallefatından hissesini aldığı Bundan esbak vefât eden merhûme Fatıma bt. Hüseyin Çavuş’un vâlidesi ve vârisesi olan Müşerref Hatun bt. Abdullah meclis-i şer‘-i şerîfde mahrûse-i İstanbul’da Hoşkadem mahallesinde vefât eden müteveffât-ı mezbûre Fatıma’nın babası merhûm Hüseyin Çavuş b. Sinan Ağa’nın evlâd-ı sıgārına vasîyy-i muhtâr olmağile muhallefâtına vâzı‘ü’l-yed olan umdetü’l-a‘yân Kaytas Çavuş bt. Abdülmennan dâme-mecdühû mahzarında takrîr-i merâm edip mevlâm olan mezbûr Hüseyin Çavuş b. Sinan Ağa vefât etdikde verâseti kebîre kızı Fahrünnisa Hatun’a ve sagīre kızı Emine’ye ve Âişe’ye ve sagīr oğlu Mehmed’e ve benden olan sagīre kızı mezbûre Fatıma’ya münhasıra olup mahalle-i mezbûrede vâki‘ olup müteveffâ-yı mezbûra intimâ ile şöhretinden müstağniyyün ani’t-tahdîd olan iki mülk menzili ve sâir muhallefâtından ba‘de’l-harc ve’l-mesârif bu husûsa sâbıkā kassâm olan fahrü’l-kuzât Mevlana Mehmed Efendi b. Mustafa imzâsıyla ve hatmi ile mümzâ ve mahtûm defterde mastûr olduğu üzere beyne’l-verese taksîm olan ancak beş yüz altmış sekiz bin altmış üç akçe bâkī kalıp meblağ-ı bâkī-i merkūmdan kızım mezbûre Fatıma’ya seksen bir bin yüz elli bir akçe hisse düşüp bundan sonra dahi sagīre-i mezbûre Emine vefât etdikde verâseti anası Mehtab’a ve li-eb karındaşı mezbûr Mehmed’e ve li-eb kız karındaşları mezbûre Fahrünnisa ve Âişe ve Safiye ve kızım mezbûre Fatıma’ya münhasıra olup babasından kendiye intikāl edip cümle mâlı olan meblağ-ı mezbûr seksen bir bin yüz elli bir akçeden ba‘de’l-harc ve’l-mesârif-i kassâm-ı askerî sâbıkā Yalınzâde Mevlana Şeyh <> Şeyh Ahmed b. Mehmed imzâsıyla ve hatmi ile mümzâ ve mahtûm defter[de] mastûr olduğu üzere yetmiş dokuz bin kırk dört akçe bâkī kalıp meblağ-ı bâkī-i mezbûrdan li-eb karındaşı olan kızım mezbûre Fatıma’ya on bin dokuz yüz doksan beş akçe hisse düşüp bundan sonra mezbûre Âişe dahi vefât etdikde verâseti li-eb karındaşı Mehmed ve kız karındaşları Fahrünnisa ve Safiye’ye kızım mezbûre Fatıma’ya münhasıra olup müteveffât-ı mezbûre Âişe’nin babasından ve li-eb karındaşı Emine’den kendiye intikāl eden cem‘an doksan iki bin yüz kırk altı akçeden ba‘de’l-harc ve’l-mesârif bi’l-fi‘il kassâm-ı askerî olup muvakkı‘-ı sadr-ı kitâbda olan efendi imzâsıyla mümzâ ve hatmi ile mahtûm defterde mastûr olduğu üzere seksen yedi bin yüz kırk altı akçe bâkī kalıp meblağ-ı bâkī-i mezbûrdan li-eb karındaşı olan kızım mezbûre Fatıma’ya on yedi bin dört yüz yirmi dokuz akçe hisse düşüp bundan sonra mezbûr Mehmed dahi vefât etdikde verâseti anası Şâkire’ye ve li-eb kız karındaşları Fahrünnisa ve Safiye’ye ve kızım mezbûreye Fatıma’ya münhasıra olup müteveffâ-yı mezbûr Mehmed’in babasından ve li-eb karındaşları Emine ve Âişe’den kendiye intikāl eden cem‘an iki yüz on dokuz bin yüz elli akçeden ba‘de’l-harc ve’l-mesârif-i kassâm-ı askerî mûmâ-ileyh defteri mûcebi üzere iki yüz on bin altı yüz elli akçe bâkī kalıp meblağ-ı bâkī-i mezbûrdan <> li-eb karındaşı olan kızım mezbûre Fatıma’ya elli altı bin yüz yetmiş üç akçe hisse düşüp bundan sonra kızım mezbûre Fatıma dahi vefât etdikde verâseti bana ve li-üm karındaşları Mustafa ve Fazlı nâm sagīrelere <> ve li-üm kız karındaşı Âişe’ye ve li-eb kız karındaşları Fahrünnisa’ya ve Safiye’ye münhasıra olup müteveffât-ı mezbûre Fatıma’ya babasından ve li-eb karındaşları Emine ve Âişe’den ve li-eb karındaşı Mehmed’den intikāl eden cem‘an yüz altmış bin yedi yüz kırk sekiz akçeden ba‘de’l-harc ve’l-mesârif bi’l-fi‘il kassâm-ı askerî mûmâ-ileyh defterleri üzere yüz altmış bin sekiz yüz kırk sekiz akçe bâkī kalıp meblağ-ı bâkī-i mezbûrdan benim südüs hisse-i şer‘iyem ancak yirmi iki bin dokuz yüz yetmiş sekiz akçe etmiş idi el-hâletü hâzihî südüs hisse-i şer‘iyem olan yirmi iki bin dokuz yüz yetmiş sekiz akçeyi elli sekiz nakd akçe ve yüz doksan bir tammü’l-vezn kâmilü’l-ayâr dînâr-i zehebi vasîyy-i muhtâr olan mûmâ-ileyh Kaytas Çavuş yedinden bi’t-tamam ve’l-kemâl alıp kabz eyledim. Min-ba‘d [24b] müteveffâ-yı mezbûr Hüseyin Çavuş’un zikr olan menzilinden ve sâir muhallefâtından medhalim ve alâkam kalmadı deyü ikrâr-ı tav‘î etdikde mâ-hüve’l-vâki‘ gıbbe’t-tasdîk ve’t-taleb ketb olundu. Fi’l-yevmi’s-sâbi‘ min-Şevvâl li-sene hamse ve elf. Şühûdü’l-hâl: Mehmed b. Ramazan, Mustafa b. Mahmud, Mehmed [b.] Hamza, Ferhad.