İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 142 Hüküm no: 110 Orijinal metin no: [24b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa, Fazlı ve Ayşe’nin vefat eden kardeşleri Fatıma’nın terekesinden hisselerini aldıkları Bundan esbak vefât eden merhûme Fatıma bt. Hüseyin Çavuş’un li-üm sagīr karındaşları Mustafa ve Fazlı’nın ve li-üm sagīre kız karındaşı ve vârisesi Âişe’nin tesviye-i umûru için kıbel-i şer‘den mansûb vasîleri olup yine babaları olan Üstâd Hamza b. Hüseyin mahfil-i kazâda müteveffât-ı mezbûre Fatıma’nın mahrûse-i İstanbul’da Hoşkadem mahallesinde fevt olan babası merhûm Hüseyin Çavuş b. Sinan Ağa’nın evlâd-ı sıgārına vasîyy-i muhtâr olmağile muhallefâtına vâzı‘ü’l-yed olan umdetü’l-a‘yân Kaytaş [Kaytas] Çavuş b. Abdullah mahzarında takrîr-i merâm edip mezbûr Hüseyin Çavuş b. Sinan Ağa vefât etdikde verâseti kebîre kızı Fahrünnisa Hatun’a ve sagīre kızları Emine’ye ve Âişe’ye ve sagīr oğlu Mehmed ve diğer sagīre kızı mezbûre Fatıma’ya münhasıra olup mahalle-i merkūmede vâki‘ olup müteveffâ-yı mezkûre intimâ ile şöhretinden müstağniyyün ani’t-tahdîd olan iki mülk menzili ve sâir muhallefâtından ba‘de’l-harc ve’l-mesârif bu husûsa sâbıkā kassâm olan Kādı Mehmed Efendi b. Mustafa imzâ ve hatmi ile mümzâ ve mahtûm defterde mastûr olduğu üzere beyne’l-verese taksîm olunan ancak beş yüz altmış sekiz bin altmış üç akçe olup meblağ-ı maksûm-ı mezkûrda mezbûre Fatıma’ya seksen bir bin yüz elli bir akçe hisse düşüp bundan sonra dahi sagīre-i mezbûre Emine vefât etdikde verâseti anası Mehtab’a ve li-eb karındaşı mezkûr Mehmed’e ve li-eb kız karındaşları mezbûre Fahrünnisa’ya ve Âişe’ye ve Safiye’ye ve mezbûre Fatıma’ya münhasıra olup babasından kendiye intikāl edip cümle-i mâlı olan meblağ-ı mezbûr seksen bir bin yüz elli bir akçeden ba‘de’l-harc ve’l-mesârif-i kassâm-ı sâbık-ı askerî Yalınzâde Mevlana Şeyh Ahmed Efendi b. Mehmed imzâsı ve hatmi ile mümzâ ve mahtûm defterde mastûr olduğu üzere yetmiş dokuz bin kırk dört akçe bâkī kalıp meblağ-ı bâkī-i mezbûrdan li-eb karındaşı olan mezbûre Fatıma’ya on bin dokuz yüz doksan beş akçe hisse düşüp bundan sonra mezbûre Âişe dahi vefât etdikde verâseti li-eb karındaşı Mehmed ve kız karındaşları Fahrünnisa ve Safiye mezbûre Fatıma’ya münhasıra olup müteveffât-ı mezbûre Âişe’nin babasından ve li-eb karındaşı Emine’den kendiye intikāl eden cem‘an doksan iki bin yüz kırk altı akçeden ba‘de’l-harc ve’l-mesârif bi’l-fi‘il kassâm-ı askerî olup muvakkı‘-ı sadr-ı kitâbda olan efendi imzâsıyla ve hatmi ile mümzâ ve mahtûm defterde mastûr olduğu üzere seksen yedi bin yüz kırk altı akçe bâkī kalıp meblağ-ı bâkī-i mezbûrdan li-eb kız karındaşı olan mezbûre Fatıma’ya on yedi bin dört yüz <> yirmi dokuz akçe hisse düşüp bundan sonra mezbûr Mehmed dahi vefât etdikde verâseti anası Şâkire’ye ve li-eb kız karındaşları Fahrünnisa ve Safiye’ye ve Fatıma-i mezbûreye münhasıra olup müteveffâ-yı mezbûr Mehmed’in babasından ve li-eb kız karındaşları Emine ve Âişe’den kendiye intikāl eden cem‘an iki yüz on dokuz bin yüz elli akçeden ba‘de’l-harc ve’l-mesârif-i kassâm-ı askerî mûmâ-ileyh defteri mûcebi üzere iki yüz on bin [-altı] yüz elli akçe bâkī kalıp meblağ-ı bâkī-i mezbûrdan li-eb karındaşı olan mezbûre Fatıma’ya elli altı bin yüz yetmiş üç akçe hisse düşüp bundan sonra mezbûre Fatıma dahi vefât etdikde verâseti anası Müşerref bt. Abdullah ve li-üm karındaşları sagīrân-ı mezbûrân Mustafa ve Fazlı’ya ve li-üm kız karındaşı Âişe nâm sagīreye ve li-eb kız karındaşları Fahrünnisa Hatun’a ve Safiye’ye münhasıra olup müteveffât-ı mezbûre Fatıma’ya babasından ve li-eb karındaşları Âişe ve Emine’den ve li-eb karındaşı Mehmed’den intikāl eden cem‘an yüz altmış beş bin yedi yüz kırk sekiz akçeden ba‘de’l-harc ve’l-mesârif bi’l-fi‘il kassâm-ı askerî mûmâ-ileyh efendi defteri üzere yüz altmış bin sekiz yüz kırk sekiz akçe bâkī kalıp meblağ-ı bâkī-i mezbûrdan oğullarım olup vasîleri olduğum sıgār-ı merkūmûn Fazlı ve Mustafa ve Âişe’nin her birine on beşer bin üç yüz on sekizer akçe hisse düşüp sıgār-ı merkūmûnun hisseleri ki cem‘an kırk beş bin dokuz [yüz] elli akçe <> eder meblağ-ı mezbûr kırk beş bin dokuz yüz elli akçeden üç yüz otuz üç <> aded tammü’l-vezn ve’l-kâmilü’l-ayâr sikke-i floriyi ve beş bin dokuz yüz doksan akçeyi meclis-i şer‘de vesâyetim hasebiyle müşârün-ileyh Kaytas Çavuş yedinden bi’t-tamam ve’l-kemâl alıp kabz eyledim deyü ikrâr-ı tav‘î etdikde gıbbe’t-tasdîk ve’t-taleb kayd-şüd. Fi’t-târih[i’l-mezbûr]. Şühûdü’l-hâl: el-Mezbûrîn.