İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 144 Hüküm no: 111 Orijinal metin no: [25a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasım Çelebi’nin terekesi hususunda eşi Halime Hatun’un iddialarını vâlidesi Fatıma Hatun’un inkâr ettiği Bundan esbak seferde vefât eden Kasım Çelebi b. Rüstem’in zevci [zevcesi] ve vârisesi olan Halime Hatun tarafından husûs-ı âtîye vekîl olup hasm-ı şer‘î huzûrunda ale’n-nehci’ş-şer‘î vekâleti sâbite olan yine babası umdetü’l-emâcid Bâli Çavuş bin Kasım meclis-i şer‘-i şerîfde serdâr-ı ekrem düstûr-ı efham nâzım-ı menâzımü’l-âlem muslih-i mesâlihi’l-ümem hazret-i Mehmed Paşa edâmallâhu ikbâlihî huzûr-ı âlîlerinde müteveffâ-yı merkūm Kasım Çelebi’nin vâlidesi ve vârisesi olan fahrü’l-muvakkarât Fatıma Hatun bt. Abdullah mahzarında takrîr-i merâm edip merkūm ve müvekkilem mezbûre Halime Hatun’un zevci olup vefât eden mezbûr Kasım Çelebi’nin cümle-i muhallefâtına vâlidesi mezkûre Fatıma Hatun vâzı‘ü’l-yed olup cümle-i muhallefâtdan beş gümüşlü kılıç ve bir gümüş debbûs ve iki gaddâreyi Ahmed nâm kimesnede rehin vaz‘ etmişdir. Muhallefât-ı mezkûre izhâr olunup müvekkilemin nısf hisse-i şer‘iyesin taleb ederiz ve müvekkilem mezbûre Halime Hatun’un bir sorgucu ve bir incili kuşağı ve bir incili istefanı ve on üç laleli bir meftûlü ve elli dört dâne inciyi ve iki dizi incisin ve incili bir kuşağı ve incili diğer istefanı ve bir cibinlikli ve incili bir beyaz atlas kaftanı ve incili bir büyük kuşağı ve gümüş leğen ve ıbrığı ve bir çatma yasdığı ve iki serâser kaftanı ve iki gümüş şamdanı ve iki çift gümüş başmağı ve gümüşî pullu kapı perdesi ve ocak başmağı ve sırmalı üç yasdığı ve bir serâser yasdığı dahi fuzûlen Ahmed’e rehin vaz‘ etmişdir suâl olunup mûcibini taleb ederin dedikde gıbbe’s-suâl mezbûre Fatıma Hatun cevâb verip oğlum müteveffâ-yı merkūm Kasım Çelebi’nin ben muhallefâtına vâzı‘ü’l-yed etmedim ve muhallefâtından bir nesneyi mezbûr Ahmed Bey’e rehin vaz‘ etmedim ve mezbûre Halime Hatun kendi esbâb defteri mûcebince zevci Kasım Çelebi’ye ol dahi bir hatuna verip rehin komağa irsâl etdikde varıp bir kimesneye rehin vaz‘ etdi nihâyetü’l-emr ben dahi bile ederim lâkin ben yapışmadım? ben komadım dedikde vâki‘ hâl hıfzen li’l-makāl ketb olundu. Fî 21 Ramazan sene 1005. Şühûdü’l-hâl: Mehmed Çavuş b. Hamza, Mehmed Çelebi b. Seyyid Ali, Mehmed b. Ali, Mehmed b. Ramazan, Ahmed b. Ali, Mustafa b. Mahmud ve gayruhum.