İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 148 Hüküm no: 119 Orijinal metin no: [26a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Musa Çavuş’un vârislerinin Mehmed Bey’deki alacaklarını tahsil ettikleri Mahrûse-i İstanbul’da Sultan Selim Han -aleyhi’r-rahmetü ve’r-rıdvân- Câmi‘-i şerîfi kurbünde olan mahallede sâkin olup sefer-i hümâyûnda vefât eden merhûm Musa Çavuş b. Ömer’in sulbiye sagīre kızları İsmihan ve Saime’nin vasîyy-i muhtârları olan Derviş Çelebi b. Ahmed ve babası ve vârisi olan mezbûr Ömer b. Hamza tarafından husûs-ı âtîye ale’n-nehci’ş-şer‘î sâbitü’l-vekâle olan fahrü’l-cüyûş Mustafa Çavuş b. Ahmed ve vâlidesi ve vârisesi olan Âişe Hatun bt. Hasan tarafından bimâ hüve nehcü’s-sübût şer‘an vekâleti sâbite olan Mustafa Çavuş b. Ali meclis-i şer‘-i şerîfde müteveffât-ı merkūmun Selanik ve Avrathisârı nâm kādılıklarda olan ze‘âmetinden sâbıkā subaşı olan ebnâ-i sipâhîyândan olan Mehmed Bey b. Kasım mahzarında ikrâr ve takrîr-i merâm edip müteveffâ-yı merkūmun zikr olunan kādılıklarda olup ze‘âmeti olan Poliçe ve Kirçe ve Haydarlı nâm karye ve gayrıda mezbûr subaşı Mehmed Bey mesfûr Musa Çavuş b. Ömer vefâtına gelinceyedek cem‘ ve tahsîl ve kabz etdiği mahsûlden zikr olunan kādılıklarda yüz kırk akçeye râyic olduğu üzere yüz altmış aded tammü’l-vezn kâmilü’l-ayâr sikke-i floriyi ve doksanar akçeye râyic olduğu üzere altı yüz elli aded kebîr guruşu ve on bin iki yüz on sekiz hurde akçeyi mesfûr Mehmed Bey yedinden bi’t-tamam ve’l-kemâl vesâyetim ve vekâletim hasebiyle alıp kabz etdik dediklerinde mâ-vaka‘a ba‘de’t-tasdîk ketb olunup sûreti yed-i tâlibe vaz‘ olundu ki lede’l-hâce müzekkir-i mâ-cerâ ola. Tahrîren fî-evâili şehri Şevvâl li-sene hamse ve elf. Şühûdü’l-hâl: Muslihiddin Efendi, Mevlana Osman Efendi b. Ebûbekir, Davud Çavuş b. Abdullah, Mustafa Çavuş eş-şehîr be-Nakkāşzâde, Mehmed b. Abdullah, Mehmed b. Ramazan