İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 154 Hüküm no: 129 Orijinal metin no: [27b-3, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Efendi’nin terekesindeki değirmenin vârisleri tarafından satıldığı Rumeli-i ma‘mûrede vâki‘ kasaba-i Ergene’de kādı iken vefât eden Ahmed Efendi b. Şeyh Ferhad’ın mevlana Mehmed Çelebi nâm oğlu kendi nefsinden asâleten mevlana Ali Çelebi nâm er karındaşı kıbelinden vekâleti bimâ hüve nehcü’s-sübût şer‘an sâbit olarak vekâleten ve yine müteveffâ-yı mezbûrun Mustafa nâm sagīr oğluna kıbel-i şer‘den mansûb vasî olan fahrü’l-mülâzımîn mevlana Veli Halîfe b. Mehmed vesâyeten ve yine merhûm-ı mezbûrun zevcesi ve vârisi olan fahrü’l-muvakarât Fatıma Hatun bt. Fethullah kıbelinden vekâleti bimâ hüve nehcü’s-sübût şer‘an sâbit olan fahrü’l-kuzât mevlana Şemseddin Efendi b. Ferruh vekâleten meclis-i şer‘-i şerîfe hâzır olup işbu akdin kendilerinden sudûruna kadar kendilerinin, müvekkillerinin ve vesâyetleri altında bulunan kimselerin sâhibi ve mâliki oldukları, kazâyı mezbûrda Değirmenköy’de vâki‘ nehr-i cârî üzerinde dâir, müteveffâ-yı mezbûra intimâından şöhretinden sebeb tahdîd ve tağyînden müstağnî bulunan üç gözlü cemî‘ değirmenlerini cümle hudûdu ve kâffe-i hukūkuyla râyicü’l-vakt yüz on bir bin akçe semen-i mu‘ayyen-i makbûzla umdetü’l-muhadderât zübdetü’l-muvakkarât Râbiatü’z-zaman ve Hadicetü’l-asr ve’l-evân Fatıma Hatun bt. merhûm Ahmed Efendi eş-şehîr bi-Kādızâde Efendi nâm hatuna -zîdet ismetühâ- bey‘-i bâtt-ı sahîh-i şer‘î ile bey‘ ettiklerini asâleten, vesâyeten ve vekâleten ikrâr eylediler. Mezbûre Fatıma Hatun da kendi mâlıyla kendisi için iştirâ eyledi. Vâki‘ ikrâr merkūme Fatıma Hatun tarafından vicâhen ve şifâhen tasdîk edildi. Mubâya‘a-i mezbûre değirmen-i mesfûrun sûk-ı sultânîde ve mecma‘-ı nâs olan mahallerde tâlibîn ve râgıbîn beyninde kirâren müzâyede olunup ragabât-ı nâs bi’l-külliye münkatı‘a oldukdan sonra müşârün-ileyhâ Fatıma Hatun üzerinde semen-i meblağ-ı merkūmda karâr edip ziyâde ile âhar tâlibi olmadığı ecilden vâki‘ oldu. Tahrîren fî-evâsıtı Şevvâl sene 1005. Şühûdü’l-hâl: Hasan Çavuş b. Abdülhay, Mehmed Efendi b. İsmail el-müderris, Ali Çelebi b. Abdülhay el-kādı, Nurullah Çavuş b. Mehmed, İbrahim b. Abdullah el-cündî, Abdürreşid b. Mehmed, Yusuf Bey b. Abdullah, Sinan Çelebi b. Ahmed el-imâm, Mustafa b. Abdullah, Mustafa b. Mahmud ve gayruhum