Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 489 Hüküm no: 583 Orijinal metin no: [99a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hamide bt. Mehmed’in Hüseyin Beşe b. Mehmed’den muhâlaa yoluyla boşandığı Husûs-ı âti’l-beyânı mahallinde ketb [ve] tahrîr iltimâs olunmağın savb-ı şer‘den irsâl olunan Mevlânâ Ahmed Efendi b. Yusuf mahmiye-i İstanbul’da Çadırcı Ahmed mahallesinde Çavuş Cami‘-i şerîfi kurbunda vâki‘ mu‘allimhâneye varıp zeyl-i sahîfede mastûrü’l-esâmî [müslimîn] huzûrlarında akd-i meclis-i şer‘-i şerîf eyledikde mahalle-i mezbûr sâkinelerinden olup zâtını ma‘rifet Hâmide bt. Mehmed nâm hâtun meclis-i ma‘kūd-ı mezbûrda, zevc-i dâhili işbu râfi‘ü’l-kitâb Hüseyin Beşe b. Mehmed nâm kimesne mahzarında ikrâr ve takrîr-i kelâm edip mezbûr Hüseyin ile hüsn-i mu‘âşeretimiz olmamağla zimmetinde mütekarrün aleyh olan altı bin akçe mehr-i müeccelim ve nafaka-i iddet-i ma‘lûme[m] üzerlerine [ve] me’ûnet-i süknâ dahi kendi üzerime olup ve mezbûrun firâşından hâsılalar ve benden mütevellideler sadriye sagīre kızlarım Fâtıma ve Ayşe’yi dahi dokuz yaşına tekmîl oluncaya değin kendi malımdan infâk ve iksâ etmek üzre zevcim mezbûr Hüseyin Beşe ile muhâla‘a-i sahîha-i şer‘iyye [ile] muhâla‘a edip ol dahi ber vech-i muharrer hul‘-ı kabûl ettikden sonra hukūk-ı zevciyyete müte‘allika âmme-i da‘vâdan mezbûrun zimmetini ibrâ ve iskāt eyledim dedikde gıbbe’t-tasdîki’ş-şer‘î vâki‘ hâli Mevlânâ-yı mezbûr mahallinde ketb ü tahrîr ba‘dehû ma‘an ba‘s olunan Mustafa b. Şaban ile meclis-i şer‘a gelip alâ vukū‘ihî haber vermeleriyle mâ vaka‘a bi’t-taleb ketb olundu. Hurrire fi’l-yevmi’s-sâbi‘ ve’l-ışrîn min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Mustafa Efendi b. Halil, Receb Çelebi b. Süleyman, Abdullah Çelebi b. Abdullah, Mustafa b. Ahmed.