Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 489 Hüküm no: 582 Orijinal metin no: [99a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Panayot v. Yani ve eşinin menzillerini Pertev Paşa Vakfı’na bey‘ bi’l-istiğlâl yoluyla sattığı Mahmiye-i İstanbul’da Mirahor mahallesinde sâkin Panayot v. Yani nâm zimmî ile zevcesi Ariş bt. İstemati nâm nasrâniye meclis-i şer‘-i şerîf-i enverde merhûm Pertev Paşa [vakfı] mütevellîsi Hasan Ağa b. Mehmed’in vekîl-i sâbitü’l-vekâle olan bâ‘isü hâze’l-kitâb İsmail Efendi b. Resul mahzarında her biri ikrâr ve takrîr-i kelâm edip ale’l-iştirâk yedimizde mülk ve hakkım olup etrâf-ı erba‘ası Yaka zimmî ve Lefter ve Murad zimmî mülkleri ve tarîk-i âm ile mahdûd büyût-ı adîdeyi müştemil mülk menzil[i] mütevellî-i mezbûr[a] yüz guruşa bi tarîki’l-istiğlâl bey‘ ve teslîm ol dahi mâl-ı vakf-ı mezbûr ile ba‘de’l-iştirâ ve tesellüm ve meblağ-ı merkūm yüz guruşu mütevellî-i mezbûrdan bi’t-tamâm ahz u kabz eylediğimizden sonra mütevellî-i müşârün-ileyh menzil-i mezkûru gıbbe’t-tahliyye ve’t-takābuz târih-i kitâbdan bir sene tamâmına değin on iki buçuk guruşa bize îcâr ve teslîm biz dahi istîcâr ve tesellüm eyledik dedikde gıbbe’t-tasdîki’ş-şer‘î Panayot zimmînin oğlu işbu hâzır bi’l-meclis Sevindik nâm zimmî meblağ-ı mezbûra ve ücret-i mezkûreye emr ve kabûlü hâviye kefâlet-i sahîha ile kefîl olmağın mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Es-Seyyid Hüseyin Efendi el-İmâm, İsmail Çelebi el-Müezzin, Ahmed b. Eyyûb Kâtib-i vakf, Ahmed b. İsmail.