İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 162 Hüküm no: 142 Orijinal metin no: [29b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çavuş’un çocuklarının vasisi olan Mehmed Çelebi’nin diğer vârislere hisselerini teslim ettiği Müteveffâ-yı âti’z-zikrin ümmü olup kendiden sonra vefât eden merhûme Hürrem bt. Abdullah’ın verâseti kebîr oğlu sipâhî Mustafa Bey b. Veli’ye ve kebîre kızı Fatıma Hatun bt. Veli’ye münhasıra olup mezbûr Mustafa Bey bundan esbak vefât eden merhûm Mehmed Çavuş b. Veli’nin sagīr oğulları Hasan ve Ali’ye vasîyy-i muhtâr olduğu cihet ile muhallefât-ı müteveffâya vâzı‘ü’l-yed olan fahrü’l-akrân Mehmed Çelebi b. Cafer mahzarında takrîr-i merâm edip vâlidem müteveffâ-yı merkūme Hürrem bt. Abdullah’ın oğlu müteveffâ-yı merkūm Mehmed Çavuş b. Veli’den irs-i şer‘î ile intikāl eden meblağ-ı merkūmdan benim hissem olan dokuz bin dokuz yüz otuz dört akçeyi mezbûr Mehmed Çelebi’den taleb ederin suâl olunsun dedikde gıbbe’s-suâl mezbûr Mehmed Çelebi cevâb verip fi’l-hakīka müteveffâ-yı merkūme Hürrem bt. Abdullah’a müteveffâ-yı merkūmdan on dört bin dokuz yüz akçe irs-i şer‘î intikāl etmişdir. Südüs hissesinden dört bin elli dört akçemi müteveffât-ı merkūmeye hâl-i hayatında teslîm etdim ve yedi bin altı yüz akçesin müdde‘î-i merkūm Mustafa Bey’e teslîm etdim ve üç bin akçesin mezbûre Fatıma Hatun’a teslîm etdim dedikde mezbûr Mustafa Bey meblağ-ı merkūme yedi bin altı yüz akçemi teslîm etdiğine mu‘terif olup lâkin müteveffâ-yı merkūme Hürrem bt. Abdullah’a dört bin elli dört akçeyi teslîm etdiğine münkir olucak mâ-vaka‘a gıbbe’t-taleb ketb olundu. Tahrîren fî-evâsıtı şehri Şevvâl sene 1005. Şühûdü’l-hâl: Ali Çavuş b. Abdullah el-mübâşir, Mehmed b. Ramazan, Mustafa b. Mahmud, Ferhad b. Abdullah ve gayruhum.