İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 163 Hüküm no: 143 Orijinal metin no: [30a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ayşe bt. Mehmed’in evinin satıldığı takdirde çocukları zarar göreceğinden satışa izin verilmediği Mahrûse-i İstanbul’da Baba Hasan Ali mahallesinde vefât eden merhûme Âişe bt. Mehmed’in verâseti zevci Kaytas b. Abdullah’a ve sulbiye sagīre kızı Kerime ve anası Fatıma bt. Mehmed’e ve li-ebeveyn karındaşı İbrahim b. Mehmed’e münhasıra olup ve cümle muhallefâtı mahalle-i merkūmede müteveffâ-yı merkūmeye intimâyla müstağniyyün ani’t-tahdîd olup yetmiş iki bin akçe ile mukavvem bir mülk menzil ve füruht olunan on dört bin üç yüz altmış akçelik muhallefât ve iki bin akçe mehr-i müeccel cem‘an seksen altı bin üç yüz altmış bir akçe mâlı olup meblağ-ı mezbûrdan müteveffât-ı merkūme üzerine şer‘an sâbit olan on sekiz bin akçe deyn ve vasiyeti mûcebince it‘âm-ı fukarâ için on iki bin akçe techîz ve tekfîn ve sâir harc-ı lâzım için dört bin dört yüz yedi akçe ihrâc olundukdan sonra beyne’l-verese bâkī kalan elli bir bin dokuz yüz elli dört akçeden anası Fatıma’ya sekiz bin altı yüz elli dokuz akçe hisse düşüp ve li-ebeveyn karındaşına dört bin üç yüz otuz akçe hisse düşüp ve zevcine rub‘ on iki bin dokuz yüz seksen sekiz akçe hisse düşüp ve kızı Kerime’ye nısf yirmi beş bin dokuz yüz yetmiş yedi akçe hisse düşüp husûs-ı mezbûre ve bakıye-i deyn ve zarûre-i nafaka için menzil-i mârrü’z-zikrin bey‘ olunması lâzım gelip lâkin hâlâ değer bahâsın etmeyip satıldığı takdirce sagīre-i merkūmeye zarar-ı fâhiş müretteb olmağın mahrûse-i mezkûrede Bitbazârı’nda Başcı Hacı Vakfı’ndan olup bir tarafı vakf-ı mezbûr ile bir tarafı Kürkçübaşı Vakfı ile iki tarafı tarîk-i âm ile mahdûd olup sagīre-i merkūmeye kānûn üzere anası müteveffât-ı mezbûreden hakk-ı tasarrufu intikāl eden bir bâb çukacı dükkânı âhara tefvîz olunup mukābele-i tefvîzde husûs-ı mezbûra ve bakıye-i deyn ve nafaka için bir mikdâr meblağ alınıp menzil-i merkūmun bey‘ olunmaması sagīreye nâfi‘ olup ve meskene muhtâc olmağın ve meclis-i şer‘de sikāt ve udûl inhâ ve ihbâr etmeğin izin verilmeyip sagīre-i merkūmeye kıbel-i şer‘den vasî nasb olunan yine babası mezbûr Kaytas dükkân-ı mestûrda olan hakk-ı tasarrufu vech-i meşrûh üzere sagīreye nâfi‘ olduğu cihetle İbrahim b. Mehmed tefvîz edip mukābele-i tefvîzde altmış bin akçeyi alıp kabz etmeğin mâ-vaka‘a gıbbe’t-taleb ketb olundu. Tahrîren fi’r-râbi‘ aşer min-Şevvâli’l-mükerrem li-sene hamse ve elf. Şühûdü’l-hâl: Mehmed b. Ramazan, Mehmed b. Abdülhay, Mustafa b. Mahmud, Ferhad b. Abdullah, Mehmed b. Hamza.