İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 163 Hüküm no: 144 Orijinal metin no: [30a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Korucu Mustafa Bey’in vasisi olduğu Mustafa Çelebi’ye hissesini ödediği Tarîk-i hâcda bundan esbak vefât eden merhûm Kapıcı Süleyman Bey b. Abdullah’ın evlâd-ı sagīrânına vasîyy-i mansûb olan Korucu Mustafa Bey b. Abdullah meclis-i şer‘de müteveffâ-yı merkūmun sinni bulûğa mütehammil olduğu hâlde bulûğuna mu‘terif olan kebîr oğlu Mustafa Çelebi mahzarında ikrâr ve takrîr-i merâm edip mezbûr Mustafa Çelebi’ye babası müteveffâ-yı merkūmdan ve li-eb kız karındaşları ve er karındaşından dahi irs-i şer‘î ile ancak nakidden intikāl edip kassâm-ı askerî defteri nâtık olduğu üzere sâbıkā benim vâzı‘ü’l-yed etdiğim yetmiş bir bin dört yüz dört akçeden hesâblaşdığımızda nakdî yirmi bir bin yüz seksen akçe hakk-ı mevrûsu zuhûr edip meblağ-ı zâhir-i merkūmdan on sekiz bin akçe mukābelesinde yine on sekiz bin akçe ile mukavvem on dört dâne la‘l ve kırk dâne hurde yâkut ve kırk yedi dâne pîrûzeli dört çift altın çiraseti mezbûr Mustafa Çelebi’de rehin vaz‘ etdim. Târih-i kitâbdan sene-i kâmile tamamında meblağ-ı merkūm on sekiz bin akçeyi mezbûr Mustafa Çelebi’ye teslîm ve edâ etdiğimde rehn-i merkūmu bana teslîm eyleye dedikde mâ-hüve’l-vâki‘ gıbbe’t-tasdîk ve’t-taleb kayd olundu. Tahrîren fi’t-târihi’l-mezbûr. Şühûdü’l-hâl: Mustafa Bey b. Veli an-nüvvâb, Keyvan bin Abdullah, Mehmedî b. Ramazan, Mustafa b. Mahmud ve gayruhum.