Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 491 Hüküm no: 585 Orijinal metin no: [99b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi v. Yani’nin alacak davasının yirmi sene geçtiği için reddi Mahmiye-i İstanbul’da Bitpazarı kurbunda sâkin takyeci tâifesinden Yorgi v. Yani nâm zimmî meclis-i şer‘-i şerîfde hâzırûn bi’l-meclis el-Hâc Hasan ve Hüseyin Ağa ve Rahime bt. Hasan’ın Süleymaniye vakfından icâreteyn-i ma‘lûmeteyn ile taht-ı tasarruflarında olup Küçük Langa’da vâki‘ lede’l-ahâlî ma‘lûmü’l-hudûd vakıf bostanlarda müste’cir olan bâ‘isü hâze’l-vesîka İstoyan v. Yuvan nâm zimmî muvâcehesinde üzerine da‘vâ ve takrîr-i kelâm edip mârrü’z-zikr bostanda mevcûd ve bir bostancı odası ve bir re’s bârgir ve adedi ilm-i şer‘î ile ma‘lûm çapa ve bel ve sâir âlât-ı zürrâ‘ın nısıfları babam Yani nâm zimmînin mülkü olup mezbûr İstoyan zikr olunan nısf hissesi için babam mezbûr Yani’ye senede ikişer bin akçe veregelip yirmi beş sene mukaddem babam mezbûr Yani hâlik olup hisse-i mezbûr merhûm İstoyan’ın yedinde kalmağla hâlâ suâl olunup sinîn-i mezkûrede ücret-i merkūmeden müctemi‘ olan mertebesi bana teslîm etmek üzre merkūm İstoyan’a tenbîh olunması matlûbumdur dedikde müdde‘î-i mezbûrun iddi‘âsı üzre eşyâ-i mezkûre ma‘nâ-yı gasb olup menâfi‘i mazmûne olmadığından mâ‘adâ yirmi sene bilâ-özr-i şer‘î terk olunan da‘vânın bilâ-emr istimâ‘ı memnû‘ olmağla mezkûr İstoyan’a suâl dahi teveccüh etmemeğin işbu vesîka bi’t-taleb ketb olundu. Fi’l-evâili Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Mustafa Çelebi b. Ahmed, İbrahim Çelebi [b.] Ahmed, Süleyman Çelebi Ser-bölük, el-Hâc Abdi b. Mahmud, Ali b. Bâli, Mehmed b. İdris.