Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 491 Hüküm no: 586 Orijinal metin no: [99b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mosi v. Saltı’nın Yako v. Yahuda’da alacağı olduğu Mahrûse-i Galata’ya tâbi‘ Beşiktaş nâhiyesinden Ortaköy nâm karyede mütemekkin Alaman cemâ‘atinden Mosi v. Saltı nâm yahudi meclis-i şer‘-i şerîfde karye-i merkūmede mütemekkin iken bundan akdem hâlik olan Kohen demekle ma‘rûf yapağıcı Yako v. Yahuda nâm yahudinin evlâd-ı sıgārlarının tesviye-i umûruna kıbel-i şer‘den mansûb vasîsi olmağla terekesine vâzı‘ü’l-yed olan Rafayel v. David nâm yahudi muvâcehesinde üzerine da‘vâ ve takrîr-i kelâm edip târih-i kitâbdan bir sene mukaddem hâlik-i merkūm Yako’ya her kırkı bir esedîye olmak üzre bin beş yüz guruşluk paramı ve dört yüz seksen aded yaldız altınımı esedîye tebdîl etmek için def‘ ve teslîm ol dahi yedimden bin beş yüz guruşluk para ile dört yüz seksen aded yaldız altınını yedimden kabz ve tesellüm edip meblağ-ı mezbûru bana kable’l-edâ merkūm Yako hâlik olmağın vasiyy-i mersûm Rafayel’e suâl olunup meblağ-ı mezbûr bin beş yüz guruşluk para ile dört yüz seksen aded yaldız altınını hâlik-i merkūmun terekesinden bana edâya tenbîh olunmak matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda karye-i mezbûre mütemekkinlerinden Yahuda v. Yasef ve İlya v. Abraham nâm yahudiler li ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ müdde‘î-i merkūm Mosi hâlik-i merkūma her kırkı bir guruşa olmak üzre bin beş yüz guruşluk parasını ve dört yüz seksen aded yaldız altınını esedîye tebdîl için bizim huzûrumuzda teslîm ve merkūm Yako dahi kabz ve tesellüm [100a] eyledi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olup ve müdde‘î-i merkūm Mosi tahlîf-i şer‘î ile tahlîf olundukdan sonra mûcebiyle ba‘de’l-hükm ve’t-tenbîh mâ vaka‘a bi’t-taleb ketb olundu. Fi’l-yevmi’s-sâlis min şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: Mustafa Çelebi b. el-Hâc Ahmed, İbrahim Çelebi b. Ahmed, İsmail Çelebi b. Ahmed, Mehmed Çelebi b. Abdullah.