İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 169 Hüküm no: 152 Orijinal metin no: [31b-2, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmihan bt. Abdullah’ın ölen kocası Ramazan Bey’den mehir alacağı olduğu Rıdvan b. Abdullah ve Cafer b. Hasan nâm kimseler meclis-i şer‘-i şerîfe hâzırân olup mahmiye-i Kostantıniyye mahallâtından el-Hâc Timur mahallesinde vefât eden Ramazan Bey b. Abdullah’ın İsmihan ve Mehmed nâm sagīreteynine vasîyy-i muhtâr olan ve husûs-ı âtîyi münkir bulunan el-Hâc Ahmed b. Abdullah nâm hasm-ı câhid mahzarında, müteveffâ-yı mezbûr Ramazan Bey’in zevcesi ve vârisi olan İsmihan bt. Abdullah kıbelinden husûs-ı âtîye vekâleti şâhideyn-i mezbûreteynin şehâdetiyle bimâ hüve nehcü’s-sübût şer‘an sâbit olan mevlana Abdurrahman Efendi b. Hasan el-imâm nâm kimseden sâdır olan da‘vâ-yı sahîha-i şer‘iyede gıbbe’l-istişhâd şöyle şehâdet ettiler ki, müvekkile-i mezbûrenin müteveffâ-yı mezbûrun zimmetinde esnâ-yı nikâhında ma‘kūdun aleyh olan mehr-i müecceli cihetinden râyicü’l-vakt sekiz bin akçe hakkı vardır. Hakkını kısmen veyâ tamamen ahz ü kabz etmediğine, zevcinin hâl-i hayatında hakkını başkasına havâle etmediğine, zimmetini bi-vechin mine’l-vücûhi şer‘iye ibrâ etmediğine dâir müdde‘iye-i merkūme tahlîf edilmeğin gıbbe ri‘âyeti şerâiti’l-kabûl şehâdetleri mûcebince hükmedildi. Cerâ zâlike ve hurrire fî-evâsıtı Şevvâl li-sene hamse ve elf. Şühûdü’l-hâl: Mehmed b. Ramazan, Mustafa b. Mahmud, Ferhad b. Abdullah, Mehmed b. Hamza, Rıdvan b. Abdullah