İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 179 Hüküm no: 165 Orijinal metin no: [34b-2, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Muharrem b. Celaleddin’in ölen Süleyman Çelebi’de kumaş bedelinden alacağı olduğu el-Hâc Mehmed b. İsmail ve Ali b. Mahmud nâm kimseler meclis-i şer‘-i şerîfe hâzırân olup mahmiye-i Kostantıniyye mahallâtından Hacce Hatun mahallesinde vefât eden Süleyman Çelebi b. Musa’nın Mehmed ve Âişe nâm sagīreynine vasîyy-i muhtâr olan Mustafa b. Muharrem nâm hasm-ı câhid mahzarında, hâmil-i kitâb Muharrem b. Celaleddin’den sâdır olan da‘vâ-yı sahîha-i şer‘iyede gıbbe’l-istişhâd şöyle şehâdet ettiler ki, müdde‘î-yi mezbûrun, müteveffâ-yı mezkûrun zimmetinde müşterâ-yı makbûz kumaş bahâsından râyicü’l-vakt iki bin beş yüz akçe hakkı vardır. Hakkını kısmen veyâ tamamen ahz ü kabz etmediğine, hâl-i hayatında hakkını başkasına havâle etmediğine, zimmetini bi-vechin mine’l-vücûhi şer‘iye ibrâ etmediğine dâir müdde‘î-i merkūm tahlîf edilmeğin gıbbe ri‘âyeti şerâiti’l-kabûl şehâdetleri mûcebince hükmedildi. Cerâ zâlike ve hurrire fî-evâhiri Şevvâl li-sene hamse ve elf. Şühûdü’l-hâl: Mahmud b. Cemaleddin, el-Hâc Piyale b. Abdullah, Mehmed b. Ramazan, Mustafa b. Mahmud, Ferhad b. Abdullah ve gayruhum