İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 178 Hüküm no: 164 Orijinal metin no: [34b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Şeyhzade Ahmed Efendi’nin zevcesi Fatıma Hatun’un mehrinden dolayı kocasının muhallefatından alacaklı olduğu Rumeli’nde Ergene köprüsü kādısı iken vefât eden merhûm Şeyhzâde Ahmed Efendi b. Şeyh Ferhad’ın zevcesi ve vârisesi olan umdetü’l-muhadderât Fatıma Hatun bt. Fethullah tarafından husûs-ı âti’l-beyâna bimâ hüve nehcü’s-sübût vekâleti sâbite olan fahrü’l-kuzât Mevlana Şemseddin Efendi b. Ferruh meclis-i şer‘-i şerîfde müteveffât-ı merkūmun kebîr oğlu ve vârisi olan Mevlana Mehmed Çelebi mahzarında takrîr-i merâm edip müteveffâ-yı merkūm Ahmed Efendi mezbûre Fatıma Hatun’u otuz bin akçe mehr-i müeccel ile tezevvüc etdikden sonra hâl-i hayatında ve kemâl-i akl ve sıhhatinde kazâ-i mezbûre gider oldukda zevcesi müvekkile-i mezbûr[e] Fatıma Hatun bt. Fethullah mehr-i mu‘accelinden on iki bin akçe ile mukavvem Hıraye Peymane nâm Rusiyye câriyesin verdikde zevcem mezbûre Fatıma Hatun’un on re’s su sığırı ve elli re’s koyun ve kırk bin akçe mehr-i mu‘accelinden zimmetimde ancak on re’s su sığırı ve elli re’s koyun ve yirmi sekiz bin akçesi kaldı zimmetimde zevcem mezbûre Fatıma Hatun’a lâzımü’l-edâ vâcibü’l-kazâ deynimdir deyü ikrâr-ı şer‘î etdi hâlâ vekâletim hasebiyle muhallefât-ı müteveffâdan taleb ederin suâl olunsun dedikde gıbbe’s-suâl ve’l-inkâr vekîl-i mersûmdan sıdk-ı makāline beyyine taleb olundukda ahrâr-ı Müslimîn ve sikāt-ı muvahhidînden fahrü’l-hutebâ Mevlana Mehmed b. Fazlullah ve Mehmed Çelebi b. eş-Şeyh Yakub meclis-i şer‘-i şerîfe hâzırân olup fi’l-hakīka müteveffâ-yı merkūm Ahmed Efendi müvekkile-i mezbûre Fatıma Hatun bt. Fethullah’ı otuz bin akçe mehr-i müeccel üzerine tezevvüc etdikden sonra hâl-i hayatında ve kemâl-i akl ve sıhhatinde kazâ-i mezbûre gider oldukda zevcesi mezbûre Fatıma Hatun’a mehr-i mu‘accelinden on iki bin akçe ile mukavvem Peymâne nâm câriyesi verdikde zevcem mezbûre Fatıma Hatun’un on re’s su sığırı ve elli re’s koyun ve yirmi sekiz bin akçesi kaldı zimmetimde lâzımü’l-edâ deynimdir deyü bizim huzûrumuzda ikrâr-ı şer‘î etdi vech-i meşrûh üzere ikrârına şâhidleriz şehâdet dahi ederiz deyü şehâdet-i şer‘iye eylediklerinde ba‘de ri‘âyeti şerâiti’l-kabûl şehâdetleri makbûle olup ve mûcebiyle hüküm olunup mâ-vaka‘a bi’t-taleb ketb olundu. Tahrîren fî-evâsıtı Ramazan li-sene hamse ve elf. Şühûdü’l-hâl: Abdülcelil b. Mehmed, Nurullah Çavuş b. Mehmed, İsmail b. Receb, Mehmed b. Mehmed, Mustafa b. Mehmed, Mehmed b. Ramazan.