İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 182 Hüküm no: 172 Orijinal metin no: [35b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hızır Bey’in vârislerinin aralarındaki davada sulh oldukları Mahrûse-i İstanbul’da Mimârşücâ‘ mahallesinde sâkin olup bundan esbak vefât eden merhûm Hızır Bey b. Derviş nâm cündînin kebîre kızı fahrü’l-muhadderât Rabia Hatun’un vekîl-i âmme-i mutlak nâfizü’l-kelâmı olup hasm-ı şer‘î mahzarında ale’n-nehci’ş-şer‘î vekâleti Mahmud b. Abdullah er-râcil ve Mustafa Çelebi b. İsmail ve Mehmed Efendi şehâdetleri ile sâbite olan fahrü’l-akrân Ahmed Çelebi b. Mustafa meclis-i şer‘-i şerîfde müteveffâ-yı merkūmun zevcesi ve vârisesi ve sagīr oğlu İbrahim ve sagīre kızı Fatıma’nın tesviye-i umûrı’çün kıbel-i şer‘den mansûb vasîleri olan Alemşah Hatun bt. Murad mahzarında ve müteveffâ-yı merkūmun kebîr oğlu Mustafa Çelebi nâm râcil mahzarında takrîr-i merâm edip müvekkilem mezbûr Rabia Hatun’un anası ve mevrûsesi merhûme Eşe Hatun bt. İsmail muhallefâtı bahâsından babası müteveffâ-yı merkūm Hızır Bey b. Derviş zimmetinde kalan on iki bin akçesi vekâlet-i âmme-i mutlakam ile müvekkilem için müteveffâ-yı merkūm[un] muhallefâtından taleb ve da‘vâ edip gıbbe’l-inkâr isbât dahi etmiş idim el-hâletü hâzihî işbu zeyl-i kitâbda esâmîsi mastûr olan muslihûn tavassut edip sagīrân-ı merkūmâna mezbûrûn sulhu evlâ ve enfa‘ görmeğin mahalle-i merkūmede vâki‘ olup cümle-i muhallefât-ı müteveffâ-yı merkūmdan tahmînen beş bin akçe kıymetli olup bir tarafı müvekkilem mezbûre mülkü ile bir tarafı Mahmud b. Abdullah er-râcil mülküyle ve bir tarafı müteveffâ-yı merkūm mülküyle ve bir tarafı Fatıma bt. Abdullah mülküyle mahdûd ve mümtâz olan hesâb-ı şatranci üzere yirmi buçuk zirâ‘ arz-ı zâtü’l-eşcârı ıslâh edip ben dahi vekâlet-i müvekkilem hasebiyle sulh-ı mastûru kabûl edip ve bedel-i sulh olup zikr olunan arz-ı mezkûreyi müvekkilem için kabz ve zabt eyledim min-ba‘d meblağ-ı mezbûrdan müteveffâ-yı mersûmun zimmetin ibrâ-i âm ile ibrâ eyledim ba‘de’l-yevm bu husûsta ve müteveffâ-yı mezbûr Hızır Bey’in veresesine intikāl eden cümle-i muhallefâtına ve bi’l-cümle husûs-ı irse müte‘allik müvekkilem mezbûreden veyâ vekîlinden da‘vâ sudûr eder ise lede’l-hükkâmi’l-kirâm mesmû‘ ve makbûle olmaya deyü bi’l-vekâle ikrâr-ı tav‘î etdikde mâ-vaka‘a gıbbe’t-tasdîk ketb olundu. Tahrîren fî 27 Şevvâl sene 1005. Şühûdü’l-hâl: Es-sâbikūn.