İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 181 Hüküm no: 171 Orijinal metin no: [35a-4, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cafer Bey’in evini karısı Alemşah Hatun’a sattığı Sinan Bey b. Abdullah el-cündî ve Ahmed Çelebi b. Ali Çelebi nâm kimseler meclis-i şer‘-i şerîfe hâzırân olup mahmiye-i Kostantıniyye mahallâtından Mimârşücâ‘ mahallesinde sâkin iken bundan akdem vefât eden merhûm Cafer Bey b. Derviş’in sulbî oğlu ve vârisi Mustafa Çelebi er-râcil nâm kimse mahzarında ve yine müteveffâ-yı mezbûrun sulbiye kızı ve vârisi olan Zamane Hatun nâm zevcesi kıbelinden husûs-i âti’z-zikre vekâleti Mahmud b. Abdullah ve Mustafa Çelebi b. İsmail ve Mehmed b. Hasan nâm kimselerin şehâdetleri ile bimâ hüve nehcü’s-sübût şer‘an sâbit olan Murad Çelebi b. Mustafa nâm kimse mahzarında, müteveffâ-yı mezkûrun zevcesi Alemşah Hatun bt. Murad’dan sâdır olan da‘vâ-yı sahîha-i şer‘iyede gıbbe’l-istişhâd şöyle şehâdet ettiler ki, müteveffâ-yı mesfûr Cafer Bey b. Derviş, hâl-i hayatı ve kemâl-i akl ve sıhhatinde, mülkiyetinde ve taht-ı tasarrufunda bulundurduğu, mahalle-i mezbûrede kâin, tahtânî bir hâneyi, ahırı, sofayı, bâb-ı müştereki, cüneyneyi, eşcâr-ı müsmire ve gayri müsmireyi müştemil, hudûdu iki tarafından müteveffâ-yı mezbûr mülküne muttasıl, bir tarafından tarîk-ı âmma, bir tarafından Mihriye bt. Mehmed mülküne müntehî olan cemî‘ menzilini cümle tevâbi‘i ve levâhıkıyla râyicü’l-vakt on altı bin akçe semen-i mu‘ayen-i makbûzla zevcesi Alemşah Hatun bt. Murad’a bey‘ etmiş idi. O dahi iştirâ eylemiş idi. Şehâdeten sahîhaten şer‘iyeten makbûleten gıbbe ri‘âyeti şerâiti’l-kabûl şehâdetleri mûcebince hükmedildi. Cerâ zâlike ve hurrire fî 26 Şevvâl li-sene hamse ve elf. Şühûdü’l-hâl: (…), Ahmed Bey b. Yusuf, Sinan Bey b. Abdullah, Mehmed Subaşı b. Abdullah, Ali Çelebi b. Turmuş, Mustafa Çelebi b. Ahmed, Ahmed Çelebi b. Mehmed, Mahmud b. Mehmed, es-Seyyid Ahmed Çelebi b. es-Seyyid Veli, Mehmed b. Hüseyin, Mehmed b. Mehmed er-râcil, Mehmed Bey b. Mustafa ve gayruhum