İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 185 Hüküm no: 178 Orijinal metin no: [36a-4, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ramazan Bey’in fakirlere yemek verilmesine dair vasiyeti Udûlden Cafer b. Hüseyin ve Veli b. Mehmed nâm kimseler meclis-i şer‘-i şerîfe hâzırân olup mahmiye-i Kostantıniyye mahallâtından el-Hâc Timur mahallesinde bundan akdem vefât eden Ramazan Bey b. Abdullah nâm cündinin Mehmed ve Emine nâm sagīreynine kıbel-i şer‘den mansûb vasî olan ve husûs-i âti’l-beyânı münkir bulunan Hamza Bey b. Abdullah nâm hasm-ı câhid mahzarında, el-Hâc Ahmed b. Abdullah’dan sâdır olan da‘vâ-yı sahîha-i şer‘iyede gıbbe’l-istişhâd şöyle şehâdet ettiler ki, müteveffâ-yı mezbûr Ramazan Bey b. Abdullah maraz-ı mevte yakalanıp başını yastığa koyduğunda âhiret azığı tedârik etmek isteyip mâlından ifrâz ve temyîz ettiği tammü’l-vezn ve sahîhü’l-ayâr kırk altın sikkesini techîz ve tekfînine ve eyyâm-ı mu‘tâdede âdet olduğu vechile it‘âm-ı fukarâya vasiyet etti ve müdde‘î-yi mezbûru da vasiyetlerinin tenfîzine vasîyy-i muhtâr seçmiş idi. Mezkûr el-Hâc Ahmed dahi vesâyet-i merkūmeyi kabûl edip hizmet-i lâzımesini edâya müte‘ahhid olmuş idi. Mezkûr Ramazan Bey b. Abdullah vasiyet-i mezbûru üzere musırran vefât eyledi. Şehâdeten sahîhaten şer‘iyeten makbûleten ba‘de ca‘li şerâiti’l-kabûl mer‘iyeten şehâdetleri mûcebince hükmedildi. Cerâ zâlike ve hurrire fî-târihi’l-mezbûr. Şühûdü’l-hâl: Es-sâbikūn