İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 186 Hüküm no: 179 Orijinal metin no: [36b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ferahnâz bt. Abdullah’ın hürre olduğu Bundan esbak sefer-i sultânîde müteveffâ olan Perviz b. Abdullah’ın sulbî kebîr oğlu olup husûs-ı âti’z-zikri münkir olan Mehmed b. Perviz mahzarında mahfil-i kazâda işbu orta boylu, gök gözlü, sarışın Rusiyyetü’l-asl Ferahnâz bt. Abdullah nâm câriye-i memlûkeden vech-i âti’z-zikr üzere da‘vâ ve istişhâd sudûrundan sonra Mehmed Çelebi b. Hüseyin ve Bâli Bey b. Abdullah nâm kalanisi-i? hâs meclis-i şerîfe li-ecli’ş-şehâde hâzırân olup fi’l-hakīka mezbûr Mehmed b. Perviz babam müteveffâ-yı mezbûr müdde‘iye-i merkūme-i mevsûfeyi silk-i mülkünde iken müdebbere eylemişdi. Hâlâ ben dahi ı‘tâk ve tahrîr eyledim dedi mezbûre Ferahnâz sâir harâir-i asliyât gibi hürredir biz bu husûsa şâhidleriz şehâdet dahi ederiz dediklerinde ba‘de ri‘âyeti şerâiti’l-kabûl şehâdetleri hayyiz-i kabûlde vâkı‘a olup mûcebiyle müdde‘iye-i merkūmenin hürriyetine hüküm olundukdan sonra gıbbe’t-taleb mâ-hüve’l-vaka‘a kayd olundu. Şühûdü’l-hâl: Ahmed Efendi b. Ali, Hasan Çelebi b. Ali, Yusuf Çelebi el-mülâzım, Mehmed b. Ramazan, Mustafa b. Mahmud ve gayruhum.