İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 187 Hüküm no: 181 Orijinal metin no: [36b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Bey’in Üstad Murad Vakfı’na istiğlal yolu ile bahçesini sattığı Mahmiye-i İstanbul’da Abdullahağa mahallesi sâkinlerinden Ahmed Bey b. Hasan nâm kimesne meclis-i şer‘de bâ‘isü’l-kitâb Üstâd Murad Evkāfı’na hâlâ mütevellî olan Behram Bey b. Abdullah mahzarında ikrâr ve i‘tirâf edip mahmiye-i mezbûrede Yedikule kurbünde vâki‘ hudûdunun bir tarafı Fatıma bt. Hüseyin mülküne ve bir tarafı Ahmed b. Nuh mülküne ve tarafeyn-i âhareyni Yusuf Ağa b. Abdülmennan mülküne müntehî olup bir bâb beyt-i ulvî ve ıstablı ve bi’r-i mâ’ı ve köşkü ve bir kenîfi müştemil olan mülk bahçemi vakf-ı mezbûr mâlı ile mütevellî-i mezbûra sekiz bin nakd râyic fi’l-vakt akçeye istiğlâl tarîkiyle bey‘ edip kabz-ı semen ve teslîm-i mebî‘ etdikden sonra hadîka-i merkūmeyi ba‘de’t-tahliye ve’t-tekābuz mütevellî-i merkūmdan dört yüz akçe icâre-i müeccele ile târih-i kitâbdan altı ay tamamına değin istîcâr edip ol dahi vech-i meşrûh üzere hadîka-i mezbûreyi bana îcâr eyledi dedikde mukırr-ı mezbûru ikrâr-ı meşrûhunda mütevellî-i merkūm Behram Bey vicâhen tasdîk ve şifâhen tahkīk edicek mâ-vaka‘a bi’t-taleb ketb olundu. Tahrîren fi’l-yevmi’r-râbi‘ aşer min-Şevvâli’l-mükerrem li-sene hamse ve elf. Şühûdü’l-hâl: Mehmed Bey b. Abdülmennan, Sinan Subaşı b. Abdullah, Mehmed b. Ramazan, Mehmed b. Yusuf el-müezzin, Mustafa b. Mahmud, Seydi b. Yusuf el-müezzin ve gayruhum.