İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 186 Hüküm no: 180 Orijinal metin no: [36b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müteveffa Hüseyin’in çocuğunun vasisinin çocuğa ait parayı ödediği Mahrûse-i İstanbul’da Câmi‘-i Mevlana Gürânî mahallesinde sâkin olup mahmiye-i Mısır’da vefât eden merhûm el-Hâc Hüseyin b. Abdullah’ın zevcesi ve vârisesi ve sagīr oğlu Abdülkerim’in vasîyy-i şer‘iyesi olan Âişe Hatun bt. Abdullah’ın vekîli olup silahdârlardan Mehmed Bey b. Abdullah mahfil-i kazâda müteveffâ-yı mezbûrun vesâyâ-yı şer‘iyesini tenfîze vasî olan el-Hâc Cafer b. Abdullah mahzarında takrîr-i merâm edip müteveffâ-yı mezbûr el-Hâc Hüseyin’in ba‘de’l-vefât eyyâm-ı mu‘tâdede fukarâyı it‘âma ve hatemât-ı şerîfeye ve utekāsına ve iki sakkayeye vesâir fukarâ-yı Müslimîne îsâ’ eylediği cem‘an yüz on bir bin yüz altmış dört <> akçe sülüs mâlı olup ba‘dehû zevce-i mezbûreye ve vasîyy-i mersûm el-Hâc Cafer ve hâkimü’ş-şer‘ ma‘rifetiyle müteveffâ-yı mezbûr îsâ’ etdiği vesâyâ-yı şer‘iyesini tenfîz için vasîyy-i merkūm el-Hâc Cafer yedinden yine muhallefât-ı müteveffâdan altmış bin on akçelik beynimizde ilm-i şer‘î ile ma‘lûm esbâb-ı mütenevvi‘ayı mezkûr el-Hâc Cafer yedinden kabz ve tesellüm etdim dedikde mâ-vaka‘a gıbbe’t-tasdîk bi’t-taleb sebt-şüd. Fi’s-sâbi‘ aşer min-Receb sene 1005 Şühûdü’l-hâl: el-Hâc Süleyman [b.] Musa, Haydar [b.] Ali, el-Hâc Sefer [b.] Davud, Sinan, Ferruh, el-Hâc Piyale, Mehmed [b.] Hamza, Sefer [b.] Şaban, Oruc [b.] İsa ve gayruhum.