İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 189 Hüküm no: 186 Orijinal metin no: [37a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Abdullah’ın Üstad Mustafa’nın muhallefatından hissesini aldığı Mahmiye-i İstanbul’da Yenibahçe kurbünde Sinanpaşa mahallesinde vefât eden Üstâd Mustafa b. Abdullah nâm na‘âlin zevce-i metrûkesi ve vârisesi olan Emine bt. Abdullah zevce-i uhrâsı olup sagīr-i sadrîsi Sefer b. Mustafa’nın ta‘dîl-i umûrı’çün hâkim-i şer‘î kıbelinden mansûb vasîsi olan Saliha bt. Abdullah mahzarında tâyi‘an ikrâr edip zevcim müteveffâ-yı mezbûrun muhallefâtından mahalle-i mezbûrede vâki‘ olup lede’l-cîrân ve’l-ahâli ma‘lûmü’l-hudûd olmağla tahdîd ve tavsîfden müstağnî olup on iki bin akçe ile mukavvem olan menzilinden be-hasebi’ş-şer‘ bana müteveccih olan semen-i hisse-i şer‘iyem ki vech-i meşrûh üzere bin beş yüz akçe olur meblağ-ı mezbûr bin beş yüz akçeyi vasîyy-i mezbûre Saliha yedinden bi’t-tamam ve’l-kemâl alıp kabz eyledim. Menzil-i merkūmda min-ba‘d medhalim kalmadı ba‘de’l-yevm menzil-i merkūma ve sâir husûs-ı mîrâsa müte‘allik benden bizzât veyâ bi’l-vâsıta da‘vâ ve taleb sudûr ederse lede’l-hükkâm makbûle olmasın dedikde mukırre-i mezbûrenin ikrâr-ı meşrûhunu mezbûre Saliha verâseten ve vesâyeten bi’l-muvâcehe tasdîk edicek mâ-vaka‘a bi’t-taleb kayd olundu ki lede’l-hâce müzekkir-i mâ-cerâ ola. Tahrîren fi’t-târihi’s-sâbık a‘lâhu. Şühûdü’l-hâl: Es-sâbik[ū]n.