İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 189 Hüküm no: 185 Orijinal metin no: [37a-3, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine Hatun’un ölen kocasında mehir alacağı kaldığı Mahmiye-i Kostantıniyye’de vâki‘ Hadîka-i cedîde kurbündeki merhûm Sinan Paşa mahallesinden el-Hâc Mustafa b. el-Hâc Hasan el-müezzin ve Mahmud Bey b. Abdullah nâm kimseler meclis-i şer‘-i şerîfe hâzırân olup Sefer b. Mustafa nâm sagīr oğlunun tesviye-i umûru için kıbel-i şer‘den mansûbe vasî Saliha Hatun bt. Abdullah mahzarında, bâ‘isetü’l-kitâb Emine Hatun bt. Abdullah’dan sâdır olan da‘vâ-yı sahîha-i şer‘iyede gıbbe’l-istişhâd şöyle şehâdet ettiler ki, mezbûre Emine Hatun’un esnâ-yı nikâhında ma‘kūdun aleyh olan mehr-i müecceli cihetinden bundan akdem mahalle-i mezbûrede vefât eden Mustafa Bey b. Abdullah nâm zevci üzerinde râyicü’l-vakt üç bin akçe-i Osmânî hakkı vardır. Hakkını kısmen veyâ tamamen ahz ü kabz etmediğine, zevcinin hâl-i hayatında hakkını başkasına havâle etmediğine, zimmetini bi-vechin mine’l-vücûhi şer‘iye ibrâ etmediğine dâir müdde‘iye-i merkūme tahlîf edilmeğin gıbbe ri‘âyeti şerâiti’l-kabûl şehâdetleri mûcebince hükmedildi. Cerâ zalike fî 15 şehri Şevvâl li-sene 1005. Şühûdü’l-hâl: Es-sâbikūn