İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 202 Hüküm no: 199 Orijinal metin no: [41a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Niğbolu sancak beyi Mustafa Bey’in vereseleri ile Elmascıbaşı Mihal’in sulh oldukları Elmascıbaşı işbu sâ‘ibü’t-tahrîrü’l-kitâb Mihal v. Antuvan nâm zimmî meclis-i şer‘-i şerîfde Rumeli’nde Niğbolu sancağı beyi iken vefât eden merhûm Mustafa Bey b. Kubad’ın evlâd-ı sıgārına kıbel-i şer‘-i şerîfden mansûb vasî olan umdetü’l-erbâbi’t-tahrîr ve’l-kalem Mustafa Efendi b. Süleyman -dâme mecdühû- mahzarında takrîr-i merâm edip elmas bahâsından müteveffâ-yı merkūm Mustafa Bey b. Kubad üzerinde olan yirmi bin akçe hakkımı bundan esbak vasîyy-i merkūm Mustafa Efendi mahzarında da‘vâ edip gıbbe’l-inkâr Mehmed Çelebi b. Yunus ve İlyas Bey b. Abdullah nâm bevvâb-ı sultânî şehâdetleriyle muvakkı‘-ı sadr-ı kitâb olan hâkim-i şer‘-i şerîf huzûrunda isbât etmişdim. El-hâletü hâzihî mâ-beynimize muslihûn tavassut edip sıgār-ı merkūmîne sulh enfa‘ olmağın on üç bin iki yüz akçeye ıslâh etdiler ben dahi sulh-ı merkūmu kabûl edip meblağ-ı merkūm on üç bin iki yüz akçeyi meclis-i sulhda vasîyy-i mûmâ-ileyh yedinden muhallefât-ı müteveffâdan alıp kabz ve tesellüm eyledim ve meblağ-ı merkūm on üç bin iki yüz akçeden yirmi bin akçeye varıncayadek altı bin sekiz yüz akçeden ibrâ-i âm ile ibrâ-i zimmet eyledim. Ba‘de’l-yevm bu husûsa benden bi’l-asâle ve’l-vekâle da‘vâ sudûr ederse lede’l-hükkâm mesmû‘a olmaya deyü ikrâr-ı tav‘î etdikde mâ-hüve’l-vâki‘ gıbbe’t-taleb kayd olundu. [Tarihi yazılmamıştır.] Şühûdü’l-hâl: Umdetü’l-a‘yân Aydınzâde Mehmed Çavuş, Mehmed Çelebi b. İbrahim, Ali Çelebi b. el-Hâc Ahmed, Ahmed b. Ali, Mehmed b. Ramazan, Mustafa b. Mahmud ve gayruhum.