İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 202 Hüküm no: 199 Orijinal metin no: [41a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Sultan’ın borcuna karşılık Hüseyin Çelebi’ye bazı eşyalarını rehin verdiği Umdetü’n-nisvâni’l-muhadderât zübedetü’l-havâtîni’l-muvakkarât Âişetü’z-zaman Fatımatü’l-asr ve’l-evân Hatice Sultan bt. el-merhûm Sinan Paşa -dâmet iffetühâ- kıbelinden husûs-ı âti’z-zikri ikrâra Ahmed Ağa b. Abdullah ve Mustafa Çavuş b. Ahmed ve Hüseyin Bey b. Abdullah şehâdetleri ile vekâleti sâbite olan umdetü’l-a‘yân makbûlü’s-sudûr ve’l-erkân Behzad Ağa b. Abdüddeyyân meclis-i şer‘-i şerîf-i râsihü’l-erkânda işbu bâ‘is-i tahrîrü’l-kitâb fahrü’l-emâsil Hüseyin Çelebi b. Bâyezid nâm bevvâb-ı sultânî mahzarında takrîr-i merâm edip mesfûr Hüseyin Çelebi b. Bâyezid’in müvekkilem müşârün-ileyhâ hazretlerinin zimmetlerinde karz-ı şer‘îden iki yüz yirmi akçe müşterâ ve makbûz semmûr kürk bahâsından olup târih-i Zilka‘desi’nin gurresinde sene-i kâmile tamamına değin müeccel otuz bin akçe cem‘an yüz otuz bin akçe mukābelesinde müvekkilem müşârün-ileyhâ hazretleri yüz aded Hürmüz incisi bir sübhâsın ve kırk sekiz aded Hürmüz incisi ile on üç zümrüdlü meftûlün ve elli altı aded Hürmüz incisi ile on bir aded laleli diğer bir meftûlün mezbûr Hüseyin Çelebi b. Bâyezid’e rehin vaz‘ edip mezbûr dahi irtihân ve tesellüm etdi deyü ikrâr-ı tav‘î etdikde mukırr-ı merkūmu mezkûr Hüseyin Çelebi ikrâr-ı meşrûhunda vicâhen tasdîk <> etdikde fahrü’t-tüccâr el-Hâc Sefer Çelebi b. el-Hâc Ramazan mahfil-i kazâda emr ve kabûlü hâviye kefâlet-i şer‘iye ile eşyâ-i mezkûre-i merhûnenin derkine kefîl oldukda mâ-vaka‘a gıbbe’t-taleb kayd-şüd. Fî-evâili Zilka‘de li-sene hamse ve elf. Şühûdü’l-hâl: Umdetü’l-emâcid ve’l-ekârim Osman Ağa b. ( ), Bekir Çelebi b. Ali el-bevvâb, Rıdvan, Hüseyin, Mehmed b. Ramazan, el-Hâc Müstedam, Ömer Çelebi b. Ramazan.