İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 205 Hüküm no: 204 Orijinal metin no: [42a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eski Diyarbakır defterdarı Mahmud Efendi’nin borcuna karşılık rehin bıraktığı eşyalarını geri aldığı İşbu bâtın-ı hüccetde ismi mastûr olup mahrûse-i İstanbul’da Bezzâzistân-ı atik ahâlisinden fahrü’t-tüccâri’l-mu‘teberîn Ali Çelebi b. el-Hâc Ahmed meclis-i şer‘-i şerîfde mahrûse-i mezbûrede Ereğli nâm mahallede bundan esbak vefât eden Ahmed Çavuş b. Mustafa’nın sagīr oğulları Mustafa ve Ahmed[‘in] tesviye-i umûru için kıbel-i şer‘den mansûb vasîleri olan Hasan Bey b. Mustafa nâm sipâhî mahzarında takrîr-i merâm edip bundan esbak Diyârbekir defterdârı olan Mahmud Efendi b. Abdülkerim zimmetinde sagīr-i mezbûrîn mâllarından karz-ı şer‘îden seksen bin akçe ve iki yıllık ribhinden, çuka bahâsından on altı bin akçe cem‘an doksan altı bin akçeye hüccet-i mezkûrda muharrer ve mastûr olduğu üzere ben emr ve kabûlü hâviye kefâlet-i sahîha-i şer‘iye ile kefîl olmuş idim. El-hâletü hâzihî vech-i meşrûh üzere kefâletim cihetinden meblağ-ı merkūm doksan altı bin akçemi vasîyy-i merkūm Hasan Bey b. Mustafa’ya def‘ ü teslîm edip meblağ-ı merkūm mukābelesinde mekfûlün-aleyh olan mûmâ-ileyh Mahmud Efendi b. Abdülkerim rehin vaz‘ etdiği bir murassa‘ şerçi? ve bir murassa‘ sikkîni ve üç murassa‘ zihgiri ve bir murassa‘ fincanı ve bir sîm üzere murassa‘ raht göbeğini ve bir murassa‘ seyfi ve bir murassa‘ altın devâtı vasîyy-i merkūm yedinden ben kabz ve tesellüm edip zabt ederim deyü ikrâr-ı tav‘î etdikde mâ-vaka‘a gıbbe’t-tasdîk ve’t-taleb ketb olundu. Tahrîren fi’l-yevmi’s-sâdis aşer min-Zilka‘de li-sene hamse ve elf. Şühûdü’l-hâl: Mehmed Çelebi b. İbrahim, Mehmed b. Abdullah er-râcil, İbrahim b. Abdullah el-cündî, Üstâd Rıdvan b. Abdullah el-cerrâh, Sinan b. Abdullah el-cündî, Mehmed b. Ramazan, Mustafa b. Mahmud.