.:: İstanbul Kadı Sicilleri ::.


İstanbul Mahkemesi 191 Numaralı Sicil (H. 1000-1027 / M. 1591-1617)
cilt: 44, sayfa: 206
Hüküm no: 206
Orijinal metin no: [42a-3, Arapça]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Âfitâb Hatun bt. Abdullah’ın vasiyeti

Mehmed b. Veli el-imâm ve Haydar b. Mustafa nâm kimseler meclis-i şer‘-i şerîfe hâzırân olup mahmiye-i Kostantıniyye mahallâtından Kürkçübaşı mahallesinde bundan akdem vefât eden Âfitâb Hatun bt. Abdullah’ın muhallefâtına vâzı‘-ı yed olan, mahmiye-i mezbûrede vâki‘ Beytü’l-mâl-i hâs emîni Mehmed Çavuş b. Abdulmuin’in mahzarında, bâ‘is-i kitâb el-Hâc Süleyman b. Halil el-müezzin nâm kimseden sâdır olan da‘vâ-yı sahîha-i şer‘iyede gıbbe’l-istişhâd şöyle şehâdet ettiler ki, müteveffât-ı merkūme Âfitâb Hatun maraz-ı mevte yakalanıp başını yastığa koyduğunda âhiret azığı tedârik etmeyi isteyip vefâtından sonra cemî‘ muhallefâtınının sülüsünün ihrâc ve temyîz edilip techîz ve tekfînine sarf edilmesini vasiyet etti ve bin akçeyi avârız-ı ehl-i mahalle-i merkūme için ta‘yîn eyledi. Bundan arta kalanın eyyâm-ı mu‘tâdede it‘âm-ı fukarâya sarf edilmesini istedi. Müdde‘î-yi mezbûru da vesâyâsını tenfîze vasîyy-i muhtâr nasb eyledi. Mezkûre Âfitâb Hatun vasiyeti üzere mukırraten ve musırraten vefât eyledi. Şehâdeten sahîhaten şer‘iyeten makbûleten ba‘de ca‘li şerâiti’l-kabûl mer‘iyeten şehâdetleri mûcebince hâkim-i şer‘î, vasiyet-i mesfûrun sıhhatine hükmetti.

Cerâ zâlike ve hurrire fi’l-yevmi’l-âşir min-Zilka‘deti’l-mübâreke li-sene hamse ve elf.

Şühûdü’l-hâl: Mehmed b. Ramazan, Mustafa b. Mahmud, Mehmed b. Hamza, Ferhad b. Abdullah