.:: İstanbul Kadı Sicilleri ::.


İstanbul Mahkemesi 191 Numaralı Sicil (H. 1000-1027 / M. 1591-1617)
cilt: 44, sayfa: 207
Hüküm no: 208
Orijinal metin no: [42b-2, Arapça]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Ölen Mehmed Çelebi’nin evinin borçları nedeniyle müzayede ile satıldığı

Bundan akdem mahmiye-i Kostantıniyye mahallâtından Alemi Bey mahallesinde vefât eden Mehmed Çelebi’nin Ümmühani nâm sagīre kızının tesviye-i umûruna kıbel-i şer‘-i şerîfden mansûb vasî olan el-Hâc Hüseyin Bey b. Abdullah el-bevvâb ve merhûm-ı mezbûrun zevcesi ve vârisi olan Fatıma Hatun bt. el-Hâc Hasan kıbelinden vekâleti bimâ hüve nehcü’s-sübût şer‘an sâbit olan Malkoç Bey b. Abdullah ve müteveffâ-yı mezbûrun li-ebeveyn kız karındaşı ve vârisi olan İsmihan Hatun bt. Ali nâm zevcesi kıbelinden vekâleti bimâ hüve nehcü’s-sübût şer‘an sâbit olan fahrü’l-cüyûş Mehmed Çavuş b. Abdülmennan meclis-i şer‘a hâzırûn olup vesâyeten ve vekâleten şöyle ikrâr eylediler ki, mahalle-i mezbûrede vâki‘, dâhilî ve hâricî muhavvatalı, muhavvata-i dâhiliyesi tahtânî iki hâneyi, iki sofayı, serdâbı, su kuyusunu ve kenîfi hâvî, muhavvata-i hâriciyesi fevkānî iki hâneyi, sofayı, mahzeni, ahırı ve kenîfi hâvî olup, hudûdu bir tarafından Haydar Ağa b. Abdullah mülkü, bir tarafından Halil Bey el-bevvâb mülkü, bir tarafından Emine Hatun mülkü ve Ağadsız diye ma‘rûf kimse mülkü bir tarafından da tarîk-ı âm ile mahdûd cemî‘ menzili cümle tevâbi‘ ve levâhıkıyla emânet-i mahkiyesi hasebiyle râyicü’l-vakt altmış üç bin akçe-i Osmânî semen-i mu‘ayyen-i makbûzla îcâb ve kabûlü, teslîm ve tesellümü hâvî bey‘-i bâtt-ı sahîh-i şer‘î ile hâmiletü’l-kitâb Fatıma Hatun bt. Hasan’a bey‘ eylediğini ikrâr etti. Vâki‘ ikrâr müşteriye-i mezbûre tarafından vicâhen ve şifâhen tasdîk edildi. Mubâya‘a-i mezbûre, müteveffâ-yı mezkûrun zarûret-i deyni için menzil-i mesfûrun sûk-ı sultânîde ve mecma‘-ı nâs olan mahallerde tâlibîn ve râgıbîn beyninde kirâren müzâyede olunup ragabât-ı nâs bi’l-külliye münkatı‘a oldukdan sonra müşârün-ileyhâ üzerinde semen-i meblağ-ı merkūmda karâr edip ziyâde ile âhar tâlibi olmadığı ecilden vâki‘ oldu.

Cerâ zâlike ve hurrire fi’l-yevmi’s-sâdisi aşere min-Zilka‘deti’l-mübâreke li-sene hamse ve elf.

Şühûdü’l-hâl: Yusuf b. Turmuş, Mustafa b. Mehmed, Ali b. Abdullah, Davud el-imâm, Mehmed Bey el-bevvâb, Hasan Çavuş b. Abdullah, Derviş b. Abdullah ve gayruhum