İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 212 Hüküm no: 216 Orijinal metin no: [44a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nuh b. Hasan’ın Mustafa Bey’de alacağı kalmadığı Bundan akdem mahmiye-i İstanbul’da Alipaşa-yı atik mahallesinde müteveffâ olan merhûm Hasan Kethudâ b. Mehmed’in sulbî kebîr oğlu Nuh b. Hasan nâm cündî meclis-i şer‘-i lâzımü’t-tevkīrde kıbel-i şer‘den mansûb sâbıkā vasîsi olan Mustafa Bey b. Abdülvahhab nâm derzi mahzarında ikrâr ve takrîr-i kelâm edip müşârün-ileyh Mustafa Bey’in hâlâ yedindeki mümzâ ve mahtûm kassâm-ı askerî defterinde mastûr olan üzere vesâyeti hasebiyle kabz eylediği yüz on altı bin beş yüz otuz sekiz akçe hisse-i şer‘iyemden altmış iki bin akçesiyle <> hâlâ sâkin olduğum evi alıverip altı bin yüz yirmi akçesiyle Karagümrük nâm mahâlde vâki‘ nısf dükkân[ı] alıverip menzil-i merkūmu ve nısf dükkân-ı mersûmu bana teslîm edip ben dahi kabûl ve kabz ve tesellüm eylediğimden sonra mâ‘adâ kırk bin dört yüz altmış akçesini dahi nakd teslîm edip vech-i meşrûh üzere meblağ-ı mezbûr on altı bin beş yüz seksen akçem[i] mezbûr Mustafa Bey yedinden bi’t-tamam ve’l-kemâl kabz ve tesellüm eyledim yedinde babam müteveffâ-yı mezbûrdan müteveccih olan hisse-i şer‘iye-i mezbûreden bir akçe hakkım kalmadı dedikde mukırr-ı mezbûrun ikrâr-ı meşrûhunu mukarrun-leh olan mezbûr Mustafa Bey vicâhen ve şifâhen tasdîk edip mâ-vaka‘a gıbbe’t-taleb kayd olundu. Tahrîren fî-evâsıtı Zilka‘de li-sene hamse ve elf. Şühûdü’l-hâl: es-sâbikūn.