İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 211 Hüküm no: 215 Orijinal metin no: [43b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nuh b. Hasan’ın vasisi Mustafa Bey’den alacağı olduğu Bundan esbak mahmiye-i İstanbul’da Alipaşa-yı atik mahallesinde müteveffâ olan merhûm Hasan Kethudâ b. Mehmed’in sulbî kebîr oğlu Nuh b. Hasan nâm cündî meclis-i şer‘-i şerîfde sâbıkā kıbel-i şer‘den mansûb vasîsi olan Mustafa Bey b. Abdülvahhab nâm derzi mahzarında ikrâr ve takrîr-i kelâm edip bundan akdem müteveffâ olan li-ebeveyn kız karındaşım Kerime’den irs-i şer‘le bana müteveccih olup mezbûr Mustafa Bey vesâyeti hasebiyle kabz eylediği elli beş bin altı yüz akçemden ve yine mezbûr Mustafa Bey yedinden bir def‘a on beş bin yedi yüz akçe ve bir def‘a dahi yedi bin yedi yüz akçe kabz eylemiş idim. El-hâletü hâzihî iki bin akçe dahi kabz eyleyip vech-i mübeyyen üzere cem‘an yirmi beş bin dört yüz akçe kabz ve tesellüm eyledim mâ‘adâ yirmi sekiz bin altı yüz akçesi yedindedir dedikde mukırr-ı mezbûrun kelimât-ı meşrûhasına mukarrun-leh mezbûr Mustafa Bey vicâhen ve şifâhen tasdîk eyledikden sonra vâki‘ [hâl] gıbbe’t-taleb kayd olundu ki lede’l-hâce müzekkir-i mâ-cerâ ola. Tahrîren fî-evâsıtı Zilka‘de li-sene hamse ve elf. Şühûdü’l-hâl: İbrahim [b.] Mustafa el-imâm, Hamza b. Ali el-müezzin, el-Hâc Mehmed b. Abdullah, Hüsrev b. Abdullah er-râcil, Mahmud b. Abdullah er-râcil, Yusuf b. Abdullah, İbrahim b. Hayâlî, Mehmed b. Bayram, Şaban b. Abdullah, Mustafa b. Mahmud, Mehmed b. Ramazan.