İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 217 Hüküm no: 221 Orijinal metin no: [45a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Bey’in, mirası için Yayabaşı Mehmed Subaşı’yı vasi tayini Dergâh-ı âlî yayabaşılarından Mehmed Subaşı b. Abdülmennan nâm yayabaşından meclis-i şer‘de hasm-ı şer‘î mahzarında vech-i âti’l-beyân üzere da‘vâ ve istişhâd sudûrundan sonra fahrü’l-hutebâ hâlâ Şehzâde Câmi‘-i şerîfinde hatîb olan Ali Çelebi b. Ahmed ve Ferhad Bey b. Abdullah nâm kimesneler mahfil-i kazâda li-ecli’ş-şehâde hâzırân olup gıbbe’l-istişhâd fi’l-hakīka mahmiye-i merkūmede Mercanağa mahallesinde müteveffâ olan Mustafa Bey b. Abdullah nâm bevvâb-ı sultânî vaktâ ki bu dâr-ı fenâdan mülk-i bekāya irtihâli karîb olduğunu bildiyse kendi nefsi için tedârik eyleyip cemî‘ mâlının sülüsü vefâtından sonra ihrâh olunup vücûh-ı hayrâta bezl ve sarf olunmaği’çün vasiyet kılıp on beş bin akçe yine vefâtı gününde techîz ve tekfîn ıskāt-ı salâtına ta‘yîn eyleyip bundan fazla her ne kalır ise <> Rumeli’nde Vidin sancağında Bana nâhiyesinde vâki‘ Nenedoviçe nâm karyede yine kendi binâ eylediği çeşmeye su getirmeğe vefâ ederse su getirile vefâ etmediği muhakkak olursa eyyâm-ı mu‘tâdede it‘âm-ı fukarâya sarf oluna deyü ta‘yîn eyleyip ve bu vasiyet-i mu‘ayyenesini tenfîze ve sagīre-i sulbiyesi Hatice’nin ta‘dîl-i umûruna müdde‘î-i merkūm Mehmed Subaşı’yı vasîyy-i muhtâr eyledi ve vesâyâ-yı merkūmenin üzerine musırran fevt oldu biz bu husûsa şâhidleriz şehâdet dahi ederiz deyü bi’l-muvâcehe edâ-yı şehâdet-i şer‘iye eylediklerinde ba‘de ri‘âyeti şerâiti’l-kabûl şehâdet-i meşrûhaları makbûle olup hâkimü’ş-şer‘î-i muvakkı‘-ı sadr-ı kitâb vasiyet-i merkūmenin sıhhatine şehâdetleri mûcebiyle hükmedip mâ-vaka‘a bi’t-taleb kayd olundu. Tahrîren fi’l-yevmi’l-hâmis ve’l-ışrîn min-Zilka‘de li-sene hamse ve elf. Şühûdü’l-hâl: Yusuf Bey b. Abdullah, Hasan Bey b. Abdullah, Yusuf b. Abdullah el-bevvâb, Ahmed b. Abdullah el-bevvâb, Rüstem Bey b. Abdullah, Davud Bey b. Abdullah, Sinan b. Abdullah er-râcil, Ahmed Subaşı b. Abdullah.