İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 219 Hüküm no: 223 Orijinal metin no: [45b-2, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zaim Hızır Bey Vakfı’nın istiğlal yoluyla Saliha Hatun’a borç verdiği Mahmiye-i Kostantıniyye nâibi mevlana Ali b. Ahmed’in imzâsıyla mümzâ, hâtemiyle mahtûm 977 senesi Şevvâl ayının yirmi üçüncü günü târihi ile müverrah, âti’z-zikr kaziyyeyi müştemil hüccet-i şer‘iyede isimleri muharrer olan Mustafa b. Mehmed ve Solak Mehmed Bey b. Abdullah ve Ahmed b. Abdullah nâm kimseler meclis-i şer‘a hâzırûn olup mahmiye-i Kostantıniyye mahallâtından Ali Bey mahallesinde vefât eden Saliha Hatun bt. Mahmud Çavuş nâm hatunun zevcesi ve vârisi olan Mehmed Çavuş b. Kasım’ın mahzarında, vâkıfı olduğu vakfın mütevellîsi bulunan Za‘îm Hızır Bey b. Haydar’dan sâdır olan da‘vâ-yı sahîha-i şer‘iyede gıbbe’l-istişhâd şöyle şehâdet ettiler ki, müteveffât-ı mezbûrenin vakf-ı merkūma asldan râyicü’l-vakt yirmi beş bin akçe ve iki senelik ücret-i kirâ bedelinden altı bin iki yüz elli akçe borcu vardır. Şu cihetle ki, müteveffât-ı mezkûre hâl-i hayatı ve kemâl-i akl ve sıhhatinde mahalle-i mesfûrede kâin, bir tarafından Cerrâh Rıdvan b. Abdullah mülkü, bir tarafından Vezzân Ali b. Abdullah mülkü, bir tarafından Azize Hatun vakfı, bir tarafından da bâyi‘a-i mezbûre mülkü ile mahdûd olan menzilini vakf-ı mezbûr mütevellîsi olan müdde‘î-yi merkūma yirmi beş bin akçeye satmış idi. O dahi vâkıf mâlıyla ve istiğlâl maksadıyla iştirâ etmiş idi. Bâyi‘a-i mezkûrenin menzil-i mezbûru istîcârı üzere ba‘de’t-tahliye ve’t-tekābuz müşterî-i mezbûr sâlifü’z-zikr târihden bir sene tamamına üç bin yüz yirmi beş akçe ücret ile kendisine icâreye verdi. Şehâdeten sahîhaten şer‘iyeten makbûleten ba‘de ca‘li şerâiti’l-kabûl mer‘iyeten şehâdetleri mûcebince hükmedildi. Cerâ zâlike ve hurrire fi’l-yevmi’r-râbi‘ ve’l-ışrîn min-Zilka‘de li-sene hamse ve elf. Şühûdü’l-hâl: Mehmed b. Ramazan, Mustafa b. Mahmud, Ferhad b. Abdullah, Mehmed b. Hamza ve gayruhum