İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 222 Hüküm no: 228 Orijinal metin no: [46b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Bey’in hazinedarbaşısı olan Hasan Bey’in muhallefattan herhangi bir şey saklamadığı Rumeli’nde Niğbolu sancağı beyi iken vefât eden merhûm Mustafa Bey b. Kubad’ın evlâd-ı sıgārına kıbel-i şer‘-i mutahhardan mansûb vasî olan umdetü’l-erbâbi’t-tahrîr Mustafa Efendi b. Süleyman meclis-i şer‘-i şerîfde müteveffâ-yı merkūmun sâbıkā hazînedârbaşısı olup utekāsından olan Kazzâz? Hasan Bey b. Abdullah mahzarında takrîr-i merâm edip mezbûr Mustafa Bey vefât etdikde yanında bulunan muhallefâtını hazînedârbaşısı mezbûr Hasan Bey kabz ve zabt eylemişdir suâl olunup mûcebini taleb ederin dedikde gıbbe’s-suâl mezbûr Hasan Bey cevâb verip fi’l-hakīka mevlâm olan mesfûr Mustafa Bey vefât etdikde müfredât defterinde mastûr olup bulunan cümle-i muhallefâtın ben kabz ve zabt eylemiş idim lâkin işbu meclis-i şer‘de hâzır olan kebîr oğlu ve vârisi umdetü’l-ümerâi’l-kirâm zübdetü’l-küberâi’l-fihâm Hüseyin Bey hazretlerine bi’t-tamam ve’l-kemâl def‘ ü teslîm eyledim deyip ve mûmâ-ileyh Hüseyin Bey dahi kabz ve tesellümüne mu‘terif olup lâkin vasîyy-i müşârün-ileyh kanâ‘at etmeyip teslîm ve tesellüm olunan muhallefât-ı mezkûreden ziyâde mezbûr Hasan Bey esbâb saklamadığına ve saklayanı bilmediğine mezbûra yemîn teklif olunsun dedikde gıbbe’t-teklif mezbûr Hasan Bey vech-i meşrûh üzere yemîn billâh etdikde mâ-hüve’l-vâki‘ kayd olundu. Tahrîren fî-evâhiri Zilka‘de li-sene hamse ve elf. Şühûdü’l-hâl: Fahrü’l-etibbâ Veli Çelebi b. İsmail, Ali Çelebi b. Ahmed et-tâcir, Mustafa b. Ahmed el-cündî, Ferhad b. Abdullah, Mehmed b. Osman, Mehmed b. Ramazan, Mustafa b. Mahmud ve gayruhum.