İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 225 Hüküm no: 232 Orijinal metin no: [47b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Bey’in kilercibaşı olan Hasan Bey’in muhallefattan herhangi bir şey saklamadığı Rumeli’nde Niğbolu sancağı beyi iken vefât eden merhûm Mustafa Bey b. Kubad’ın evlâd-ı sıgārına kıbel-i şer‘den mansûb vasîsi olan umdetü’l-emâcid ve’l-ekârim câmi‘ü’l-mehâmid ve’l-mekârim Mustafa Efendi b. Süleyman meclis-i şer‘-i şerîfde müteveffâ-yı merkūmun sâbıkā kilârcıbaşısı olan Hasan Bey b. Abdullah mahzarında takrîr-i merâm edip mezbûr Mustafa Bey vefât etdikde kilârına müte‘allik muhallefâtını kilârcıbaşısı olan mezbûr Hasan Bey kabz ve zabt etmişdir suâl olunmasın taleb ederin dedikde gıbbe’s-suâl mezbûr Hasan Bey cevâb verip fi’l-vâki‘ mesfûr Mustafa Bey vefât etdikde müfredât defterinde mastûr olup kilârına müte‘allik mevcûdesin ben kabz ve zabt eylemişdim lâkin işbu meclis-i şer‘de hâzır olan kebîr oğlu ve vârisi umdetü’l-ümerâi’l-kirâm Hüseyin Bey hazretlerine bi’t-tamam ve’l-kemâl def‘ ü teslîm eyledim deyip ve mûmâ-ileyh Hüseyin Bey dahi kabz ve tesellümüne mu‘terif olup lâkin vasîyy-i müşârün-ileyh kanâ‘at etmeyip teslîm ve tesellüm olan muhallefât-ı mezbûreden ziyâde mezbûr Hasan Bey esbâb saklamışdır ve saklamadığına ve saklayanı bilmediğine mezbûra yemîn teklif olunsun dedikde gıbbe’t-teklif mezbûr Hasan Bey vech-i meşrûh üzere yemîn billâh etdikde mâ-hüve’l-vâki‘ gıbbe’t-taleb kayd olundu. Tahrîren fî-târihi’l-mezbûr Şühûdü’l-hâl: Veli Çelebi b. İsmail, Ali Çelebi b. el-Hâc Ahmed, Mustafa b. Ahmed el-cündî, Cafer b. Abdullah, Yusuf b. Abdullah ve gayruhum.