İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 247 Hüküm no: 250 Orijinal metin no: [53b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hac yolunda ölen Hasan Bey’in Hatice bt. Hasan’a borcu olmadığı Sâbıkā mahrûse-i İstanbul’da Davud Paşa mahallesi sâkinlerinden olup tarîk-i hacc-ı şerîfde vefât eden merhûm Hasan Bey b. Abdullah nâm kimesnenin rebîbesi Hatice bt. Hasan meclis-i şer‘-i şerîfde merhûm-ı mezbûrun bint-i sulbiyesi Râziye muvâcehesinde takrîr ve da‘vâ edip babam mezkûr Hasan’dan irs-i şer‘î ile bana intikāl eden mâlımdan merhûm-ı mezbûr Hasan Bey on bin nakd-i râyicü’l-vakt akçemi alıp harc etmişdir. Zimmetlerinde bâkīdir. Muhallefâtından taleb ederim suâl olunsun dedikde mezkûre Râziye’den suâl olundukda bi’l-külliye inkâr ile cevâb vermeğin müdde‘iye-i mezkûreden da‘vâsına mutâbık beyyine taleb olundukda mezkûre Hatice izhâr-ı beyyineye kudretim yokdur mezkûre Râziye babası merhûm-ı mezbûrun bana olan deynine âlime ve vâkıfe değil idiğine istihlâf olunsun demeğin mezkûre Râziye babasının müdde‘iye-i merkūmeye zikr olunan mikdâr meblağ ve kalîl ve kesîr deyni var idiğine âlime ve vâkıfe olmadığına yemîn billâhi etdikde kat‘-ı nizâ‘ ve fasl-ı husûmet olunup vâki‘ hâl gıbbe’t-taleb ve’s-suâl ketb ü tahrîr olunup yed-i tâlibe vaz‘ oluna ki lede’l-hâce kâşif-i mâ-cerâ ola. Tahrîren fî-evâsıtı Cemâziyelûlâ min-şühûri li-sene elf min-hicreti’n-Nebeviye Şühûdü’l-hâl: es-Sâbikūn.