Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 498 Hüküm no: 596 Orijinal metin no: [102a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Çelebi b. Ali’nin menzil hissesini Hacı Ahmed b. Mehmed’e satması Mahmiye-i İstanbul’da Uzun Şucâ‘ mahallesinde sâkin iken bundan akdem vefât eden Ahmed Ağa b. Mehmed nâm acemin verâseti zevce-i metrûkesi Sâliha bt. Abdullah ve Sâliha bt. Abdurrahman hâtunlara ve sulbiye sagīre kızı Fâtıma’ya ve anası Vefârâ bt. Abdullah’ı i‘tâk eden Hatice Hâtun’un sadrî oğlu Ahmed Çelebi b. Ali nâm kimesneye münhasıra olduğu şer‘an zâhir oldukdan sonra mezbûr Ahmed meclis-i şer‘-i şerîf-i enverde işbu râfi‘ü’l-kitâb el-Hâc Ahmed b. Mehmed mahzarında ikrâr ve takrîr-i kelâm edip ebniyesi mûrisimiz merkūm Ahmed Ağa’nın mülk ve hakkı olup ve arsası merhûm Şehsuvar Hanım vakfından îcâr-ı mu‘accele ve altmış akçe icâre-i müeccele ile ile’l-vefât taht-ı tasarrufunda olup mahalle-i mezbûrede vâki‘ bir tarafdan Ayşe Hâtun menzili ve bir tarafdan kazzâz Yusuf menzili ve bir tarafdan Kiler Ağası vakfı olan odalar ve bir tarafdan tarîk-i âm ile mahdûd dâhiliyyesi fevkānî iki oda ve kiler ve tahtânî bir matbah ve bir mahzen ve kenîf ve hâriciyyesi fevkānî iki oda ve bir sofa ve kenîf ve tahtânî bir sagīr odayı müştemil menzilin ebniye-i memlûke-i mezkûresinden sekiz sehimden hisse-i irsiyye-i şer‘iyyem olan üç sehm-i şâyi‘ini, bi cümleti’t-tevâbi‘ merkūm el-Hâc Ahmed’e bey‘ ba‘dehû Ahmed ile üç yüz yetmiş beş guruşa bey‘ ve teslîm ve arsasından hissemi dahi izn-i mütevellîyle meccânen ferâğ ve tefvîz ve merkū[m] el-Hâc Ahmed dahi ber vech-i muharrer iştirâ ve kabûl ettiğinden sonra semen[i] olan meblağ-ı mezbûr üç yüz yetmiş beş guruşu tamâmen ahz u kabz eyledim ba‘de’l-yevm menzil-i mezbûrda olan üç sehim hisse-i irsiyyem merkūm el-Hâc Ahmed’in mülk-i müşterâsı olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fî gāyet-i Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Mustafa Efendi b. Şeyh Ali İmâm, Mehmed Efendi b. Mahmud, Mustafa Efendi b. Ahmed.