Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 499 Hüküm no: 597 Orijinal metin no: [102a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsmail Efendi b. Ali’nin eşi Fâtıma bt. Hasan’a Kasım Ağa Vakfı’na ait mukátaalı vakıf bahçenin kullanım hakkını devretmesi Husûs-ı âti’l-beyânın mahallinde ketb u tahrîri iltimâs olunmağın savb-ı şer‘-i enverden Mevlânâ es-Seyyid Mustafa Efendi b. Ahmed Efendi irsâl olunup ol dahi mahmiye-i İstanbul’da Kasım Ağa mahallesinde sâkin el-Hâc İsmail Efendi b. Ali’nin menziline varıp zeyl-i kitâbda mastûrü’l-esâmî müslimîn huzûrunda akd-i meclis-i şer‘-i kadîm eyledikde mezbûr el-Hâc İsmail meclis-i ma‘kūd-ı mezbûrda zevce-i menkûhası bâ‘isü’l-kitâb Fâtıma bt. Hasan Efendi nâm hâtun mahzarında ikrâr ve takrîr-i kelâm edip arsasının merhûm-ı mezbûr Kasım Ağa vakfına senede yedi yüz akçe mukāta‘ası ve üzerinde mağrûse eşcâr akd-i âti’z-zikrin sudûruna değin yedimde mülküm olup mahalle-i mezbûrede vâki‘ bir tarafdan ba‘zan Mehmed Çelebi mülkü ve bir tarafdan Kasab Mehmed Çelebi mülkü ve bir tarafdan merhûm Kasım Ağa odaları ve bir tarafdan Çukurbostan ve bir tarafdan ba‘zan es-Seyyid ( ) tasarrufunda olan bahçe ve bir tarafdan ba‘zan merhûme Fâtıma’nın mülk menzili ile mahdûd bahçenin eşcâr-ı memlûkesini târih-i kitâbdan on ay mukaddem zevcem mezbûre Fâtıma’ya üç yüz esedî guruşa bey‘ ve teslîm ve arsasını bâ izn-i mütevellî ferâğ ve tefvîz ol dahi iştirâ ve kabûl ve tefevvüz eyledikden sonra semeni olan meblağ-ı mezbûrdan merkūme Fâtıma Hâtun’un zimmetini ibrâ-i âmm-ı kātı‘ü’n-nizâ‘la ibrâ ve iskāt etmişidim hâlâ bahçe-i mahdûd-ı mezkûrenin eşcâr-ı mağrûsesi mezbûre Fâtıma’nın mülk-i müşterâsı ve arsası dahi dâhil-i havza-i müfevvezi olmuşdur keyfe mâ yeşâ ve hasbe mâ yahtâr mutasarrıfe olsun dedikde gıbbe’t-tasdîk vâki‘ hâli Mevlânâ-yı mezbûr mahallinde tahrîr ve ba‘dehû ma‘an irsâl olunan [102b] Receb b. Mahmud ve Hasan b. Mehmed ile meclis-i şer‘a gelip alâ vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’l-hâmis min şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: Hasan Çelebi b. Ali, Mustafa Beşe b. Mehmed, Mustafa Beşe b. Abdullah, İbrahim Efendi el-İmâm, es-Seyyid Cafer Efendi el-Müezzin, Mehmed b. Mustafa, İbrahim b. Sefer, Mustafa b. Ali, el-Hâc İsmail b. Murad.