İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 254 Hüküm no: 263 Orijinal metin no: [55b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman Çavuş’un muhallefatında yer almayan doru atın büyük oğlu Hüseyin’e babasının sağlığında hibe ettiği Mahrûse-i Kostantıniyye’de <> Koca Mustafa Paşa mahallesinde vefât eden merhûm Süleyman Çavuş b. ( ) nâm kimesnenin sulbî oğlu Mehmed nâm sagīre vasîyy-i şer‘î olan Hamza Çavuş b. Hüseyin nâm kimesne meclis-i şer‘-i şerîfde merhûm-ı mezbûrun [56a] kebîr oğlu Hüseyin Çelebi mahzarında takrîr-i kelâm edip mezbûr Hüseyin Çelebi’de merhûm-ı merkūmun bir doru atı vardır, kısmete idhâl olunmamışdır suâl olunup onda dahi sagīr-i merkūmun hisse-i şer‘iyesi ta‘yîn olunmasını taleb <> ederin demeğin mezbûr Hüseyin Çelebi’ye suâl olundukda zikr olunan atı merhûm benim için iştirâ edip ve bana hibe ve temlik edip ben dahi kabûl ve kabz edip nice müddetdir ki mülkiyet üzere benim tasarrufumdadır. Babamın kat‘a alâkası yokdur deyü cevâb verip ve vasîyy-i mezkûr hibe-i mezbûra münkir olmağın merkūm Hüseyin <<Çelebi’den>> Çelebi’den kelâm-ı meşrûhuna beyyine taleb olundukda udûl-i Müslimînden ve sikāt-ı muvahhidînden el-Hâc Ferruh b. Abdullah ve el-Hâc Ali b. Dede nâm kimesneler li ecli’ş-şehâde hâzırân olup fi’l-vâki‘ merhûm-ı mezbûr hâ[l-i] hayatında ve kemâl-i sıhhatinde Hacc-ı şerîfden gelir iken zikr olunan atı iştirâ etdikde oğlum Hüseyin için hibe ve temlik edip ol dahi kabûl ve kabz edi[p] nice müddet mülkiyet üzere tasarruf etmişdir, mülk-i mevhûbudur, gayri kimesnenin onda medhali yokdur deyü edâ-i şehâdet-i şer‘iye etdiklerinde gıbbe’t-ta‘dîl ve’t-tezkiye şehâdetleri hayyiz-i kabûlde vâki‘ olup zikr olunan at merkūm Hüseyin Çelebi’nin mülk-i mahzı idiğine hükmolunup vâki‘ hâl bi’t-taleb ketb [ve] tahrîr olunup yed-i tâlibe vaz‘ ve def‘ olundu ki lede’l-hâce kâşif-i mâ-cerâ ola. Tahrîren fî-evâhiri Cemâziyelûlâ min-şühûri sene elf. Şühûdü’l-hâl: es-Sâbikūn.