İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 254 Hüküm no: 262 Orijinal metin no: [55b-2, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman Çavuş’un, hanımına mehir borcu olduğu Udûlden Mehmed b. Mustafa tabbâh-ı sultânî ve el-Hâc Mehmed b. Abdullah er-râcil nâm kimseler meclis-i şer‘-i şerîfe hâzırân olup bundan akdem mahmiye-i Kostantıniyye mahallâtından Mustafa Paşa-yı atik mahallesinde vefât eden Süleyman Çavuş’un Mehmed nâm sagīr oğluna kıbel-i şer‘den mansûb vasî olan fahrü’l-akrân Hamza Çavuş b. Hüseyin nâm hasm-ı münkir mahzarında, merhûm-ı mezbûrun zevcesi Sitâre bt. Abdullah kıbelinden husûs-ı âti’z-zikre vekâleti bimâ hüve nehcü’s-sübût şer‘an sâbit olan Abdi b. Turgud’dan vekâleten sâdır olan da‘vâ-yı sahîha-i şer‘iyede gıbbe’l-istişhâd şöyle şehâdet ettiler ki, zevce-i mezbûre Sitâre hatunun esnâ-yı nikâhında ma‘kūdun aleyh olan mehr-i müecceli cihetinden müteveffâ-yı mezbûr zevci üzerinde râyicü’l-vakt dokuz bin akçe hakkı vardır. Hakkını kısmen veyâ tamamen ahz ü kabz etmediğine, zevcinin hâl-i hayatında hakkını başkasına havâle etmediğine, zimmetini bi-vechin mine’l-vücûhi şer‘iye ibrâ etmediğine dâir müdde‘iye-i merkūme tahlîf edilmeğin gıbbe ri‘âyeti şerâiti’l-kabûl şehâdetleri mûcebince hükmedildi. Cerâ zalike fî-evâhiri Cumâdelûlâ min-şühûri sene elf mine’l-hicreti’n-nebeviye. Şühûdü’l-hâl: Es-sâbikūn