İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 266 Hüküm no: 279 Orijinal metin no: [59b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Bey b. Ali’nin muhallefatından saklandığı iddia edilen eşya ile ilgili davanın geçersiz olduğu Mahrûse-i Kostantıniyye’de Hatice Sultan mahallesinde vefât eden merhûm Mehmed Bey b. Ali nâm kimesnenin veled-i sagīri Ali[‘ye] kıbel-i şer‘-i şerîfden vasî olup tarîk-i şer‘î üzere vesâyeti sâbite olan Emrullah Çelebi b. Mehmed nâm kimesne merhûm-ı mezbûrun zevcesi ve vârisesi Âişe bt. Derviş nâm hatun meclis-i şer‘-i şerîfe ihzâr <> ve mahzarında takrîr-i da‘vâ edip merhûm-ı mezbûr vefât zamanında nukūd-ı mevcûdesi vesâir muhallefâtı mezkûre Âişe zabt ve kabzında olmağla mezkûre Âişe’den sagīr-i mezkûrun hisse-i şer‘iyesini vesâyetim hasebiyle taleb etdiğimde mezbûre Âişe merkūm-ı mezbûrun nukūd-ı mevcûdesinde ve zimem-i nâsda olan meblağdan bana cem‘an elli üç bin akçe teslîm eyleyip vesâir muhallefâtından defter-i kassâm-ı askerîde mastûr olan esbâbları getirmemişdir. Meblağ-ı mezkûrdan defterde mukayyed olan esbâbdan mâ‘adâ merhûm-ı mezbûrun nukūd ve esbâbından mezbûre Âişe <> zimmetinde ba‘zı esbâb dahi kalmışdır, suâl olunup ihrâc olunmasını taleb ederim demeğin merkūme Âişe’ye suâl olundukda merkūm-ı mezbûrun muhallefâtından <> vasî-i mezkûra teslîm etdiğim meblağ-ı mezkûr ve esbâb-ı merkūmeden gayri bende nesne kalmamışdır deyü inkâr ile cevâb vericek müdde‘î-yi mezkûrdan <> mezbûre Âişe zimmetinde merhûm-ı mezbûrun muhallefâtından ba‘zı nesne kaldığına beyyine taleb olundukda izhâr-ı beyyineden âciz olup merkūme Âişe istihlâf olunmasını taleb eylemeğin merkūme Âişe merkūm-ı mezbûr muhallefâtından meblağ-ı mezbûr ve esbâb-ı merkūmeden mâ‘adâ nesne sak[la]madığına yemîn billâh teklif olundukda mezbûre Âişe merkūm-ı mezbûr muhallefâtından vasîyy-i merkūma teslîm etdiği nukūd ve zimem ve esbâbdan mâ‘adâ kendi zimmetinde <> nakden vesâir esbâbdan bir akçesi ve bir habbesi ism-i mâl ıtlâk olunur nesnesi kalmadığına yemîn billâh edip vasîyy-i merkūm da‘vâ-yı mezbûresinden men‘ olunup vâki‘u’l-hâl bi’t-taleb ketb olundu. Tahrîren fî-evâhiri Cemâziyelâhir li-sene elf. Şühûdü’l-hâl: Mehmed Bey b. Ahmed, Yakub b., Abdi el-imâm, Hasan b. Ahmed, Süleyman Çavuş b. Abdullah, Kasım Bey b. Abdullah, el-Hâc Kasım b. Abdullah, Mustafa b., Mehmed, Sinan b. Abdullah, Hüsrev b. Abdullah er-râcil, Ömer b. Abdullah, Kasım Bey b. Abdullah el-cündî, Ömer b. Abdülkerim, Osman b. Abdülkerim, Mehmed b. Ramazan, Mustafa b. Mahmud ve gayruhum