Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 501 Hüküm no: 599 Orijinal metin no: [102b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Harsi bt. Mosi’nin menzilini İbrahim Paşa Vakfı’na bey‘ bi’l-istiğlâl yoluyla sattığı Husûs-ı âti’l-beyânın mahallinde tahrîri iltimâs olunmağın savb-ı şer‘-i münîrden irsâl olunan Mevlânâ es-Seyyid Abdülmu‘tî Efendi merhûm İbrahim Paşa vakfına bi’l-fi‘l mütevellî olan umdetü’l-emâsil ve’l-eşbâh el-Hâc Mahmud Ağa b. Sefer’in mahmiye-i İstanbul’da Şeyh Ebülvefâ mahallesinde vâki‘ menziline varıp zeyl-i kitâbda muharrerü’l-esâmî udûl-i müslimîn ve sikāt-ı muvahhidîn huzûrunda akd-i meclis-i şer‘-i âlî eyledikde Hasköy kasabasında Keçeci mahallesinde sâkine Harsi bt. Mosi v. Aslan nâm yahudiye tarafından husûs-ı âti’l-beyâna vekîl olduğu zât-ı mezbûreyi ma‘rifet-i şer‘iyye ârifân karındaşı Yasef v. Mosi ve diğer Yasef v. Navani nâm yahudiler şehâdetleriyle şer‘an sâbit olan Koturna v. Mosi nâm yahudi meclis-i ma‘kūd-ı mezkûrda mütevellî-i merkūm el-Hâc Mahmud Ağa mahzarında ikrâr ve takrîr-i kelâm edip müvekkile-i mezbûre Harsi yedinde mülkü olup zikr olunan Keçeci mahallesinde vâki‘ bir tarafdan Frenk oğlu nâm yahudi mülkü ve bir tarafdan Ferayil mülkü ve bir tarafdan Aslan ve Kamal mülkleri ve bir tarafdan tarîk-i hâsla mahdûd fevkānî ve tahtânî yedi bâb oda ve iki sofa ve matbah ve üç bodrum ve üç yüz altı zirâ‘ arsayı müştemil mülk menzilini, bi cümleti’t-tevâbi‘ mütevellî-i merkūm el-Hâc Mahmud Ağa’ya altı yüz guruşa bi tarîki’l-istiğlâl bey‘ ve teslîm ol dahi vakf-ı mezbûr ile iştirâ ve tesellüm ettiğinden sonra semen-i mezbûr altı yüz guruşu yedinden tamâmen ahz u kabz ve tesellüm edip yine mütevellî-i merkūm menzil-i mezbûru ba‘de’t-tahliyye ve’t-takābuzı’ş-şer‘î târih-i kitâbdan bir sene tamâmına değin doksan esedî guruşa müvekkile-i mezbûreye îcâr ve teslîm ol dahi istîcâr ve kabûl ve kabz eyledi dedikde gıbbe’t-tasdîk mezbûr Harsi’nin zevci işbu hâzır bi’l-meclis Abraham v. Samson nâm yahudi asl-ı mâl olan meblağ-ı mezbûr altı yüz guruşa ve ücret-i mezkûreye tarafeynden emr ve kabûlü hâviye kefâlet-i sahîha-i şer‘iyye kefîl ve zâmin olmağın vâki‘ hâli Mevlânâ-yı mezkûr mahallinde tahrîr ba‘dehû ma‘an irsâl olunan Receb Çelebi b. Şaban ve Mehmed b. İdris ile meclis-i şer‘a gelip alâ vukū‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sânî min şehri Ramazâni’l-mübârek sene seb‘a ve seb‘în ve elf. Şuhûdü’l-hâl: Mustafa Çelebi b. Mehmed, İbrahim Ağa b. Ahmed, el-Hâc Mustafa Kethüdâ-yı hisar, Abdullah Çelebi b. Mustafa, el-Hâc Osman b. Cafer, Receb Çelebi b. Şaban, Mehmed Çelebi b. İdris ve gayr mine’l-huzzâr.