Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 500 Hüküm no: 598 Orijinal metin no: [102b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Mustafa b. Mehmed’in Abdülvehhâb Efendi b. Ahmed’e olan borcunu ödemeden ölmesi sebebiyle rehin bırakılan malların satılması Mahmiye-i İstanbul’da Seyyid Ömer mahallesinde sâkin olup bundan akdem mahrûse-i Edirne’de vefât eden Solak el-Hâc Mustafa b. Mehmed b. Abdullah’ın verâseti zevce-i metrûkesi Hatice bt. Halil’e ve sulbî kebîr oğulları Mehmed Çelebi ve Abdülkādir Beşe ve kebîre kızı Rahime’ye münhasıra oldukdan sonra mezbûr Abdülkādir Beşe meclis-i şer‘-i şerîfde mahmiye-i mezbûrede Debbâğ Yunus mahallesinde sâkin Abdülvehhâb Efendi b. Ahmed mahzarında ikrâr ve takrîr-i kelâm edip bundan akdem mezbûr Abdülvehhâb Efendi, babam müteveffâ-yı mezbûr el-Hâc Mustafa’ya hayâtında bin dört yüz guruş idâne ve teslîm ve mukābelesinde on dokuz denk astarı irtihân ve kabz ve kable’l-edâ ve’l-fek babam vefât edip ba‘dehû mezbûr Abdülvehhâb Efendi rehin-i mezbûru karındaşım mezbûr Mehmed Çelebi ma‘rifetiyle bin beş yüz üç guruşa âhara bey‘ ve semeninden deyn-i merkūm ve otuz yedi guruş mesârif-i ma‘lûmesini dahi istîfâ ve bâkī yüz otuz altı guruş yedinde bâkī kalıp mukaddemâ ben meblağ-ı bâkī-i mezbûrdan bana âid kırk yedi buçuk guruşu merkūm Abdülvehhâb Efendi’den taleb ve da‘vâ ve edâsına hükm-i şer‘î lâhık olmuşidi hâlâ merkūm Abdülvehhâb Efendi meblağ-ı mezbûr kırk yedi buçuk guruşu bana edâ ve teslîm ben dahi yedinden tamâmen ahz u kabz ettiğimden sonra husûs-ı mezbûr ve deyn-i mezkûr bin dört yüz guruşa ve rehn-i mezbûr ve mesârif-i merkūma ve târih-i kitâba gelince beynimizde cereyân eden sâir hukūk-ı ma‘lûme ve mechûleye müte‘allika âmme-i da‘vâdan merkūm Abdülvehhâb Efendi’nin zimmetini ibrâ-i âm [ile] ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fî evveli Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: İmâm Ahmed Efendi b. Mahmud, Mustafa Beşe b. ( ), Ali Kapudân, İbrahim Çelebi b. Mehmed.