İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 276 Hüküm no: 295 Orijinal metin no: [62b-1, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun bt. Mehmed’in işlerini takip için vekâlet verdiği Mehmed Çelebi b. Hüseyin ve Mehmed Çelebi b. Ahmed nâm kimseler meclis-i şer‘-i şerîfe hâzırân olup, âti’z-zikr tevkîli münkir bulunan hasm-ı câhid mahzarında, hâmil-i hâze’l-kitâb Mustafa Çelebi b. Murad’dan sâdır olan da‘vâ-yı sahîha-i şer‘iyede gıbbe’l-istişhâd şöyle şehâdet ettiler ki, vilâyet-i Rumeli-i ma‘mûrede vâki‘ Niğbolu kasabasında vefât eden reis-i sultânî Mehmed b. Abdullah nâm müteveffânın zevcesi ve vârisi ve müteveffâ-yı mezbûrun Seher ve Abdülbâki nâm sagīreynine vasiyye bulunan Âişe Hatun bt. Mehmed nâm hatun müsteşhed-i mezbûru sagīreyn-i mezbûreynin kasaba-i mezkûrede vâki‘ bahçedeki hissesini da‘vâya, kabzına ve kendisine îsâle ve zimem-i nâsda bulunan cemî‘ alacaklarını almaya asâleten ve vekâleten vekîl ve nefsine nâib-i menâb eyledi. O dahi vekâlet-i merkūmeyi kabûl edip hizmet-i lâzımesini edâya müte‘ahhid oldu. Şehâdeten sahîhaten şer‘iyeten makbûleten ba‘de ca‘li şerâiti’l-kabûl mer‘iyeten mine’t-ta‘dîl ve’t-tezkiyeti’ş-şer‘iye şehâdetleri mûcebiyle hükmedildi. Cerâ zâlike ve hurrire fi’t-târihi’l-mezbûr. Şühûdü’l-hâl: Mustafa b. Mahmud ve Mehmed b. Ramazan ve Mehmed b. Osman ve Hasan b. Abdullah ve Şaban b. Mustafa er-râcil