İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 278 Hüküm no: 299 Orijinal metin no: [62b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Memi Çelebi’nin Osman’da alacağı olduğu Mahrûse-i İstanbul mahallâtından Suhte Sinan mahallesinde bundan akdem vefât eden Memi Çelebi b. İskender li-eb ve üm karındaşı ve vârisesi İne Hatun mahfil-i kazâda tüccâr tâifesinden el-Hâc Osman b. Ömer mahzarında takrîr ve da‘vâ edip bundan akdem müteveffâ-yı mezbûr Memi Çelebi hâl-i hayatında ve kemâl-i sıhhatinde bey‘ ediver deyü mezbûr el-Hâc Osman’a bir istefan teslîm edip mezbûr el-Hâc Osman bir istefan tesellüm edip mezbûr el-Hâc Osman dahi zikr olunan istikanı yüz yirmi bin akçeye bey‘ edip semen-i mezbûr-ı alıp kabz edip hâlâ meblağ-ı mezbûrdan nısf hisse-i şer‘iyemi mezbûrdan taleb ederin suâl olunsun dedikde gıbbe’s-suâl mezbûr el-Hâc Osman cevâb verip fi’l-vâki‘ müteveffâ-yı mezbûr zikr olunan istefanı bey‘ edivermek için bana teslîm edip ben dahi yüz yirmi bin akçeye bey‘ edip semen-i mezbûr yüz yirmi bin akçeyi müteveffâ-yı mezbûra bi’t-tamam teslîm etdikden sonra meblağ-ı mezbûrdan seksen bin akçesini kızı mezbûre Asiye’ye cihâz alıvermek için yine bana teslîm eyledi meblağ-ı mezbûr seksen bin akçe üç ay mikdârı bende durup kendi marîz oldukda vefâtından bir gün mukaddem meblağ-ı mezbûru maraz-ı mevtinde mezbûre Asiye’ye kapı ardından götürüp bi’t-tamam teslîm eyledim. Meblağ-ı mezbûrdan bende bir akçe ve bir habbe bâkī kalmadı dedikde vâki‘ hâl gıbbe’t-taleb ketb olundu yed-i tâlibe vaz‘ olundu. Tahrîren fi’t-târihi’l-mezbûr Şühûdü’l-hâl: Mustafa b. Mahmud ve Hüsrev b. Abdullah ve Mehmed b. Ramazan ve gayruhum.