İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 280 Hüküm no: 303 Orijinal metin no: [63a-4, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayas b. Abdullah’ın evinin Beytülmal tarafından müzayede ile satıldığı Bundan akdem Tophâne mahallâtından Kuloğlu mahallesinde vefât eden Ayas b. Abdullah’ın muhallefâtına vâzı‘-ı yed olan, mahmiye-i Kostantıniyye’de vâki‘ Beytü’l-mâl-i hâs emîni umdetü’l-a‘yân Abdullah Çavuş b. Hızır meclis-i şer‘a hâzır olup şöyle ikrâr ve i‘tirâf eyledi ki, müteveffâ-yı mezbûrun muhallefâtından olan, Yoros karyesinde kâin, tahtânî iki hâneyi, su kuyusunu ve kenîfi hâvî, hudûdu bir tarafından Macar Mustafa mülkü, bir tarafından merhûm Yahya Efendi Vakfı, bir tarafından tarîk-ı âm ve bir tarafından da arz-ı hâliye ile mahdûd bulunan cemî‘ menzili râyicü’l-vakt on bin akçe semen-i mu‘ayyen-i makbûzla bâ‘is-i hâze’l-kitâb Mehmed Bey b. Hüseyin’e bey‘ eyledi. Mezbûr Mehmed Bey de kendi mâlıyla ve kendisi için menzil-i merkūmu iştirâ etti. Mubâya‘a-i mezbûre menzil-i mesfûrun emîn-i Beytü’l-mâl kâtibi İbrahim Bey b. Abdülmennan ma‘rifeti ile sûk-ı sultânîde ve mecma‘-ı nâs olan mahallerde tâlibîn ve râgıbîn beyninde kirâren müzâyede olunup ragabât-ı nâs bi’l-külliye münkatı‘a oldukdan sonra müşârün-ileyh üzerinde semen-i meblağ-ı merkūmda karâr edip ziyâde ile âhar tâlibi olmadığı ecilden vâki‘ oldu. Tahrîren fî-evâhiri Muharremi’l-harâm li-sene selâse ve elf. Şühûdü’l-hâl: Mustafa b. Mahmud, Mustafa b. İlyas, Mehmed b. Ramazan, Ferhad b. Abdullah