İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 279 Hüküm no: 302 Orijinal metin no: [63a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Efendi’nin kardeşi Mehmed Efendi’de olan alacağının vârislerince talep edilmesi Bundan akdem Akkirman kazâsından münfasıl iken kazâ-i mezbûrede vefât eyleyen merhûm ve mebrûr Mustafa Efendi b. Siyami’nin kendinden akdem vefât eyleyen zevcesi Fahrünnisa’dan olan sagīre kızı Nesli’nin vasîyy-i şer‘îsi olup vâlidesi karındaşı olan aynü’l-felât ve zeynü’l-vülât Mevlana Lütfullah Efendi b. Muhyiddin Efendi vesâyeten ve müteveffâ-yı merkūmun sagīr oğlu Mehmed’e kıbel-i şer‘-i kavîmden vasî nasb olunup zevcesi olan fahrü’l-muhadderât Asiye Hatun bt. el-merhûm Ahmed Efendi vesâyeten ve asâleten meclis-i şer‘-i mübîn-i envere müteveffâ-yı merkūmun karındaşı olan umdetü’l-müderrisîn zeynü’l-muhakkıkīn Mevlana Mehmed Efendi b. Siyami mahzarında takrîr ve da‘vâ kılıp bundan esbak mezkûr Mehmed Efendi müteveffâ-i merkūmun ba‘zı muhallefâtın bey‘ edip kabz etmeğin hâlâ ne mikdâr akçe kabz eylediği mûmâ-ileyhden istisfâr olunup makbûzu tahsîl ve tahlîs olunmasını taleb ederiz dediklerinde gıbbe’s-suâl müdde‘î-yi mezbûr otuz bir bin dokuz yüz altmış altı akçelik esbâb bey‘ eyleyip elân meblağ-ı mezbûr zimmetinde olduğuna i‘tirâf eylemeğin meblağ-ı merkūmun edâsına hükmolundukdan sonra bu vesîka kayd olundu. Şühûdü’l-hâl: Eşrefü’l-müderrisîn Mevlana Sinan Efendi b. Mehmed, fahrü’l-müsta‘idîn Mevlana Hüsam Efendi b. İlyas, Muslihiddin b. Mahmud, Mehmed b. Ramazan, Mustafa b. İlyas ve gayruhum.