İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 286 Hüküm no: 315 Orijinal metin no: [65a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şehrizol beylerbeyisi Ferhad Paşa’nın Ali Çelebi’de olan alacağı Bi’l-fi‘l Şehrizol beylerbeyisi olan emîrü’l-ümerâi’l-kibâr kebîrü’l-kibâri’l-ahyâr sâhibü’l-izzi ve’l-vakār hazret-i Ferhad Paşa kıbelinden husûs-ı âti’l-beyâna vekîl olup vekâlet-i mahkiyesi paşa-yı mûmâ-ileyh dîvânî kâtibi olan umdetü’l-erbâbi’t-tahrîr ve’l-beyân Abdi Çelebi b. Mehmed ve Kara Ulus kādısı olan iftihârü’l-kuzâti’l-kirâm Mevlana Mehmed Efendi Abdulkadir şehâdetleri ile sâbite olan dergâh-ı felek-intibâh-ı sa‘âdet-destgâh çavuşlarından aynü’l-a‘yân makbûlü’s-sudûr ve’r-rikâb Mehmed Çavuş b. el-Hâc Kasım mahkeme-i şerî‘at-şerîfe-i garrâ-i Muhammediye’de Bezzâz Sinan-ı atik bâzergânlarından işbu hâfız-ı sifr-i şer‘î zâbit-i zâlike zübüri’l-mer‘î fahrü’t-tüccâr zahrü’l-hüccâc ve’z-züvvâr Ali Çelebi b. el-Hâc Ahmed mahzarında bi’l-vekâle ikrâr edip müvekkilim olan paşa-i mûmâ-ileyh için mûmâ-ileyh Ali Çelebi yedinden târih-i kitâbdan altı ay va‘de ile mâ-beynimizde ma‘lûm yüz bin fıddî akçe’i ba‘zı emti‘a-i mütenevvi‘a iştirâ edip iştirâ olunan emti‘a’i vekâletim hasebiyle mezkûr Ali Çelebi yedinden bi’t-tamam alıp kabz eyledim zikr olunan yüz bin akçeye ki tekîd-i bi’l-asl nısfı elli bin akçe olur kefîl ve zâmin oldum dedikde vekîl-i merkūmûn vekâleten ve kefâleten olup ikrârını mukarrun lehü’l-mezbûr vicâhen ve şifâhen tasdîk etdikden sonra kayd olundu. Şühûdü’l-hâl: İftihârü’l müderrisîn Mevlana Sinaneddin bin Mehmed, Fahrü’s-sâdât Seyyid Abdi Çavuş, Abdülmennan b. Abdi Çavuş, Sefer Çelebi b. Ramazan ve gayruhum.